Tribunal Distrital Dili (TDD) hala’o julgamentu ba kazu violensia domestika la’en baku nia fen ne’ebe ho kondisaun isin rua hela.
Kazu ne’e rasik akontese iha subdistritu Ermera data 14-3-2012.
Iha akuzasaun husi Ministeriu Publiku (MP) ne’ebe lee sai husi juis president iha audensia julgamentu ne’e, katak iha kalan mais ou menus tuku sia dadersan, arguido MG hirus lezada MF, tanba MF ba toba iha nia maun nia uma sein konesementu husi arguido.
Tanba arguido nervosu liu, antaun arguido lori sumasu tuda lezada no dudu lezada monu iha kama leten, no buka katana atu oho lezada, no iha altura ne’eba lezada isin rua fulan 5 ona.
Nune’e ho tauk lezada halai ba nia maun alin sira hodi kesar kestaun ne’e, no ikus mai lezada ho nia maun ba polisia hodi hato’o keixa.
Depois de rona akuzasaun ne’e, arguido klarifika, katak akuzasaun ne’e balun loos no balun mos la los.
Tuir arguido iha altura ne’eba arguido buka katana laos atu oho lezada maibe atu ta’a ai horis sira iha uma oin hodi lampiaskan nia hirus ne’e.
“Hau nia ferik oan hatene kuandu hau hirus ne’e bain-bain hau lampiaskan ba sasan deit maibe hau nunka baku nia,” dehan Arguido iha tribunal.
No wainhira kazu ne’e lao iha tribunal arguido no lezada hela hamutuk uma ida no durante tinan rua nia laran ne’e nunka mosu problema entre lezada ho arguido.
Entretantu arguido rasik hetan defeza husi afvogadu Paulino da Costa Alves (Defensor Publik) husu ba juis president atu fo pena suspensaun deit tanba arguido rekunhese duni aktu ne’ebe nia halo ba lezada no agora dadaun sira moris hamutuk no nunka mosu tan problema.
Depois rona tia declarasaun husi arguido no defeza juis president foti desizasaun atu fo pena suspensaun durante tinan ida ba arguido.
