Hanesan faktu no evidensia ida forte atu hatete ba publiku no komunidade internasional sira kona ba aktu violasaun direitus humanus ne’ebe Militar Japaun halo hasoru Povu Timor –Leste liu –liu feto Timor –Leste iha tinan (1942-1945) fulan Agostu tinan ne’e Asosiasaun HAK sei publika rezultado peskiza ba publiku. 
Sisto Dos Santos hateten intensaun husi peskiza ne’e mak atu kompleta informasaun hotu liga ho invazaun Militar Japaun iha Timor –Leste, klaru sira mai halo autodefesa ba Timor –Leste maibe iha mos aktu immoral ne’ebe sira komete iha tinan 72 liu ba sira husik hela fitar ida ba povu Timor –leste ne’ebe seidauk kura.
“Husi rezultado ida ne’e atu hatete ba publiku no komunidade internasional katak aktu violasaun direitus humanus ne’ebe militar Japaun komete iha tinan 72 liu ba sira husik hela fitar no kanek ba Povu Timor –Leste ne’ebe seidauk kura,” dehan Nia.
Nia hatutan bainhira Governu Japaun seidauk husu deskulpa formalmente ba Povu Timor –Leste liu –liu Sobrevivente husi Jugun Ianfu ne’ebe sei moris fitar ne’ebe sira husik hela sei nafatin iha.
Peskiza ne’e inisia husi Asosiasaun HAK no Koligasaun Japaun nian hahu husi tinan 2005 ne’ebe iha tempu badak sei publika ba publiku ho informasaun, evidensia no dadus ne’ebe kompletu liga ho invazaun military Japaun iha Timor-Leste.
Iha fatin hanesan estudantes, Inocençio De Jesus Xavier hateten peskiza ne’e importante tebes hanesan evidensia ida atu bele halo advokasia no petisaun ba governu Japaun hodi responsabiliza ba sira nia ema nia hahalok immoral ne’ebe sira halo hasoru Povu Timor –Leste liu –liu feto sira.
“Rezultado peskiza ne’e importante tebes hanesan istoria ida ba jerasaun foun sira atu hatene tanba iha sobrevivente barak mak mate ona iha ida rua deit sei moris tempu ona atu iha istoria,” dehan Nia.
Nia hatutan governu Timor-Leste tenke konsidera hotu istoria ne’ebe iha inklui mos istoria invazaun militar Japaun mai Timor –Leste iha tinan 72 liu ba, tanba istoria mak klamar ba independensia.
