Membru Falintil-Forsa Defeza Timor- Leste (F-FDTL) nain 30 husi komponente naval tuir treinamentu iha roo funu Amerika ho tipu Aboard USS Kidd (DD6-100) nia laran durante fulan ida.
Brigadeiro Jeneral, Filomeno Paixao, hateten total lolos hamutuk sira nain 90, maibe fahe ba grupu rua; nain 30 tuir treinamentu iha roo leten no nain 60 aprende hamutuk ho forsa naval Amerika iha fatin treinamentu.
“Iha roo leten aprende kona ba roo ne’e atu halai oinsa no makina sira iha laran ne’e nia funsaun uja hanusa,” Brigadeiro Paixao hateten, iha Dili.
Enkuantu sira seluk ne’e aprende kona ba manutensaun roo nian bainhira at no uja makina saida mak bele hadia roo ne’e inklui aprende buat seluk ne’ebe relevante ho roo nian.
“Espera katak ho abilidade ne’ebe sira hetan no iha, ajuda dezenvolve liu tan instituisaun F-FDTL ba oin,” Paixao esperansa.
Enkuantu Rear Admiral Candy Thebaud, iha nia vizita mai Timor-Leste, hateten sira nia vizita mai iha ne’e hakarak halo treinamentu hamutuk no troka esperiensia ba malu entre forsa rua ne’e iha roo leten inklui iha Portu Hera.
“Hau hanoin, katak fahe esperiensia ba malu ne’e bele aumenta tan ita nia konesementu ne’ebe diak ba oin,” Rear Admiral Thebaud hateten.
hebaud hateten, liu husi fahe esperiensia ne’e hamosu ona parseria ne’ebe metin entre nasaun rua (Estadu Unidus da Amerika no Timor-Leste) iha future.
Iha parte seluk Membru Komisaun B (seguransa, defeza no negosiu estranjeirus), Deputadu Cesar Valente, apresia tebes ho kooperasaun bilateral entre Forsa Naval Amerika no Timor-Leste.
“Amerika durante ne’e fo ona sira nia apoia lubuk ida ba setor hotu-hotu iha Timor Leste, e ida ne’e pasu positive ida wainhira relasaun ne’e habelar liu ba forsa naval sira,” Deputadu Valente apresia.
