Sekretaria Estado ba Promosaun Igualidade (SEPI), Idelta Maria Rodrigues, hateten SEPI sei koopera ho UN Women fo formasaun no kapasitasaun ba ekipa ne’ebe sei ba aprezenta relatoriu II relatoriu CEDAW iha Jenebra.
Nia hateten, ekipa ne’ebe sei ba ne’e reprejenta estado Timor –Leste no sira sei hatan perguntas husi peritu sira, tanba ne’e husu ministerio ida-idak tenke nomeia ema ne’ebe iha konesementu klean kona ba asuntu jeneru nian.
“Hodi hein kalendarizasaun husi komite CEDAW Jenebra, ami fo formasaun kapasitasaun ba sira, tanba sira sei hasouru ho ema peritu sira, tenke iha preparasuan ne’ebe diak,” SE Rodrigues hateten.
Nia hatutan, formasaun sira ne’e normalmente perita mundial sira mak sei fo, hodi prepara estado ida-idak nia ekipa atu ba hatan perguntas hirak ne’ebe peritu sira sei husu relasiona ho relatorio ne’ebe estado ba aprezenta.
Nia dehan, SEPI sei tau orsamentu no hetan apoia mos husi UN Women atu haree ba preparasaun ekipa, tanba la fasil atu halo relatorio ida no ba hatan perguntas ne’ebe peritu sira hotu.
Iha parte seluk, Pontu Focal Jeneru Ministeriu Edukasaun, Afonso Soares, hateten nudar ministeriu ne’ebe bo’ot presiza iha konesementu klean kona ba lala’ok aprezentasaun relatorio ne’e rasik.
“Ne’ebe ami presiza formasaun ida atu bele iha preparasaun ida diak no konesementu kona ba regras hotu ne’ebe iha atu bele resposta mos tuir dalan,” Soares hateten.
Entretantu, Adjuntu Provedorio dos Direitus Humanu e Justisa (PDHJ), Silveiro Baptista Pinto, hateten preparasaun ne’e importante, tanba esperiensia ne’ebe iha, iha regras barak mak presiza fo atensaun.
