Ministeriu Obras Publiku sei tau orsamentu hodi hadia ponte Samalari, distritu Baucau ne’ebe aat durante tinan ida ona.
Sekretariu Estadu Obras Publiku (SEOP), Luis Vaz Rodrigues, hateten ponte Samalari presiza duni atu hadia, e sei hare osan iha kapital dezenvolvementu nia hodi aloka ba iha ponte ne’e.
“Sei hare no sei hadia, ne’e tuir planu ne’ebe iha ona,” SE Rodrigues hateten iha Dili.
Maibe, nia dehan, presiza hetan relatoriu husi director regional sira, atu nune’e husi parte ministeriu bele halo kalkulasaun ba orsamentu sira ne’e.
“Antes ita aloka osan presiza hetan relatoriu husi tekniku sira,” nia hateten.
Iha tinan ne’e orsamantu ba kapital dezenvolvementu hamutuk $30,664, nia hateten, numeru ne’e ki’ik liu kompara ho tinan kotuk (2013) $46,500 mil.
Iha fatin seluk Deputada Ana Ribeiro, hateten governu tenke hadia duni ponte ne’e, tanba populasaun Samalari atu ba suku seluk tenke liu husi ponte.
“Uluk, hau ba Baucau Xefe Suku Samalari kestiona duni ponte ne’e mai hau,” Deputada Ribeiro hateten.
