Diretor Klinika Ospital Nasional Guido Valadares (HNGV), Aniceto Barreto, hateten sala maternidade iha ospital nasional la sufsiente ona atu akomula hotu inan isin rua sira hodi hetan atendementu tanba numeru inan partus kada loron aumenta. 
Nia afirma, kuaze inan isin rua hamutuk 500 resin mak partus iha ospital durante fulan ida no kada loron iha 50 resin mak partus, susar atu akomula hotu tanba ema hotu halai mai iha HNGV,” Doutor Maia hateten, iha Bidau, Dili.
“Hau espera semana oin Sentru Saude Vera Cruz funsiona, nune’e inan sira ne’ebe mai ho normal haruka fali ba partus iha sentru saude e ospital atende deit inan sira ne’ebe komplikadu hanesan tensaun altu, ain liman bubu inklui komplikasaun bebe nian, it abele halo intervensaun,” nia hateten.
Hahu fulan oin, nia dehan, HNGV sei halo selesaun ne’ebe klaru ba pasiente hotu ne’ebe tama iha sala emergensia, sira ne’ebe normal haruka fila ba uma maternidade sira, tanba iha ne’eba iha ona parteira no medikus ne’ebe treinadu.
Doutor Maia hato’o kestaun ida ne’e relasiona ho kazu lamentasoens pasiente (inan partus) ne’ebe lolos partus iha ospital, maibe medikus haruka nia fila partus iha sentru saude, tanba fatin la to’o.
Entretantu membru Komisaun F (saude, edukasaun,kultura, veteranus no igualidade jeneru), Deputada Ilda Maria da Conçeicão, hateten problema ne’e akontese tanba jestaun ladiak, liu-liu uma maternidade ne’ebe iha hodi kontrola inan isin rua sira ne’ebe iha sira nia area kobertura.
Nia dehan, sistema no sosializasaun informasaun importante, atu komunidade sira bele konsidera mos uma maternidade ne’ebe besik sira nia hela fatin.
“Sentru saude sira ne’e tenke iha ona lista inan isin rua sira iha sira nia area kobertura,nune’e bele halo akompanhamentu ba sira to’o iha partus, se iha komplikadu ruma bele evakua ba ospital nasional,” Deputada Ilda hateten.
Buat importante ida mos mak atitude pesoal saude nian atu fo atendementu ba inan isin rua sira, tanba tuir nia, keixa ne’ebe komisaun hetan dalabarak parteira sira hakilar inan feto sira ho lia fuan ne’ebe lolos la merese atu koalia.
