Membru Parlamentu Nasional kestiona kona ba projetu emerjensia ne’ebe la’o tiha, maske budget ba obra ne’e rasik seidauk aprova.
Membru Komisaun E (infrastrutura, transporte, komunikasaun), Deputadu Inacio Moreira, hateten tuir lolos orsamentu ba projetu emergensia ne’e diskute hamutuk iha diskusaun Orsamentu Jeral Estadu (OJE) 2014,foin lalais ne’e.
“Obra balun to’o tiha 70% no balun 100 pursentu ona, ida ne’e oinsa,” Deputadu Moreira kestiona, iha Parlamentu.
Nia mos husu ba kompania ne’ebe halo projetu ne’e, tenke tuir prosesu legal, katak tenke iha dokumentus asina de kontratus, depois hetan orden hala’o projetu mak foin bele halo.
“Kompania sira tenke hare iha dekretu lei ne’e, katak halo obra ne’ e desizaun husi sekretariu Estadu ou Ministru, labele naran hala’o deit,” Deputadu Moreira hateten.
Hatan ba preokupasuan ne’e Sekretariu Estadu Obras Publiku (SEOP), Luis Vaz Rodrigues, katak projetu emergensia iha distritu lima ne’e hala’o tiha ona.
“Osan seidauk aprova, entaun projetu la la’o, agora ita hein hela osan,” nia hateten.
Nia dehan, Parlamentu sei halo diskusaun klean kona ba osan ba projetu emerjensia ne’e, tanba osan ne’e ho montante bo’ot.
Nia hateten, osan ne’e bo’ot, tanba total projetus de emergensia iha distritu lima hamutuk 152 obra, no kada projetu ida presiza osan $489,794.40.
