Diretor Ajensia Dezenvolvementu Nasional, Avelino Marcal, hateten uma ne’ebe iha Kuartel Falintil Forsa Defeza Timor-Leste (F-FDTL) nia kotuk iha distritu Baucau ne’e la’os uma Millenium Development Goal (MDG) maibe uma F-FDTL nian.
Nia dehan, uma hirak ne’e halo ho emergensia ba membrus F-FDTL sira. “Halo uma ita uja material pre-fabrikanu tenke iha bee moos, iha eskola no buat ida integradu iha ne’eba, ne’e mak ita bolu MDG,” Diretor Marcal hateten, iha Parlamentu Nasional.
Diretor ADN ne’e hateten, uma ba membrus F-FDTL iha ne’eba hamutuk 200 resin prontu hotu ona, agora falta bee moos mak seidauk.
“Bee dada tiha ona, maibe komunidade sira mak koa kanu tui-tuir dalan, ne’e mak bee la to’o,” nia hateten.
Entretantu tuir fiskalizasaun Komisaun D nian iha distritu Manufahi, identifika katak uma MDG hamutuk 123 iha aldeia Bee Metan,suku Betano komunidade hela tiha ona, maibe kondisaun la diak tanba tempu udan bee tama uma laran.
“Uma ne’e nia pondasi badak liu, entaun tempu udan bee tama hotu iha uma laran, enkuantu iha tempu bailoro manas liu,” Deputadu Ana Belo hateten.
Tanba ne’e, nia husu ba ministeriu kompetente tenke iha estudu viabilidade ne’ebe mak klean antes halo uma hirak ne’e, nune’e bele garante nia kualidade e mos presiza iha lina koordenasaun ne’ebe diak entre ministeriu relevantes.
Iha fatin hanesan Deputadu Inacio Moreira, hateten uma MDG durante ne’e sai problema bo’ot, tanba ne’e nia husu tenke hamutuk kria sistema diak nune’e bele solusiona.
“Agora dadauk uma hirak ne’e ema sira ne’ebe iha osan aluga fila fali deit,” nia hateten.
