Prezidente Republika, Taur Matan Ruak (TMR) deskontente ho membrus Falintil Forsa Defeza Timor Leste (F-FDTL) ne’ebe dalabarak komete krimi agravadu simples hasoru komunidades iha terenu.
Prezidente TMR hato’o sentementu ida ne’e bainhira nia lee jornal sira sempre hare hetan oknum F-FDTL balun nia naran sai iha jornal halo krimi.
“Hau loron –loron hare jornal, laiha jornal loron ida mak imi nia ema sira tuku malu la sai iha jornal para hau hare,” Prezidente TMR hateten, iha selebrasaun loron F-FDTL nian ba dala 13, (02 Fevereiru) iha Fatuhada, Dili.
TMR hateten, mesmu agora dadaun nia asumi kargu nudar Prezidente da Republika, maibe nia parte sei la husik instituisaun F-FDTL no nafatin akompanha.
“Uluk kuandu despede ho imi, hau hateten, hau lori hau nia fuan sorin balun e sorin balun hela ho imi. Tanba ne’e mesmu hau iha uma, mesmu iha gabinete loron-loron hau tau tilun no tau matan ba imi,” Prezidente TMR hateten.
Tanba ne’e, nia husu ba membrus F-FDTL ne’ebe involve iha krimi atu muda hahalok sira ne’ebe la diak, nune’e bele hetan fiar husi komunidades.
Iha fatin hanesan Sekretariu Estadu Defeza (SED), Julio Tomas Pinto, rekonese katak preokupasuan ne’ebe Xefe Estadu hato’o ne’e los no agora tempu atu bele muda hahalok hirak ne’e.
“Tempu ona atu hadia, hadia ita nia komportamentu, ita nia hahalok no ita nia disiplina,” SE Pinto hateten.
Nia dehan, kritika ne’e importante ho nune fanun institusaun F-FDTL bele hadia saida maka salah no bele mos aumenta tan saida maka diak ona no dezenvolve diak liu tan ba futuru.
