Diresaun Nasional Kontrolu ba Kualidade Bee (DNKKB) fahe mapa Idrojeolojia Timor –Leste ba Sekretariu Estadu Aqua e Saneamentu, hodi nune’e sira bele hatene kona ba rekursu bee iha rai okos.
Diretor DNKKB, Osorio Gregorio de Araujo, hateten mapa idrojeolojika mak mapa ne’ebe hatudu akiferu sira nia luan hamutuk ho jeolojia, idrojeolojia, meteorolojia no karakteristika bee iha rai leten.
“Ne’ebe bele influensia no tulun kompreensaun kona ba sistema bee iha rai okos,” Diretor Araujo hateten, iha Mandarin, Dili.
Nia dehan, mapa ne’e bele uja ba esplorasaun bee iha rai okos no halo avaliasaun ba impaktus hosi mudansa klimatika ba bee iha rai okos no maneja hasai bee hosi rai okos ho mudansa entre tempu bailoron no udan.
Nia hateten, durante halo mapa ne’e, DNKKB servisu hamutuk ho pais doadores hanesan Australia ho Norwegia, atu dezenvolve projetus jestaun rekursu de aqua no realize mos kapasitasaun iha Timor-Leste.
Enkuantu Sekretariu Estadu Eletrisidade (SEE), Januario da Costa Pereira ne’ebe ao mesmu tempu reprezenta Sekretariu Estadu Agua e Saneamentu, hateten mapa ne’e importante tebes no komunidade presiza duni mapa ne’e.
“Ita nia rai presiza tebes mapa idrojeolojia ne’e, tanba ho mapa mak ita bele hatene lolos no fiar katak wainhira ba kee iha duni bee,” SE Pereira hateten.
Iha fatin hanesan Minister Conselhor, Department of Foreign Affairs and Trade, Vin Ashcroft, hateten rai Australia hanesan mos Timor-Leste, tanba bee kuaze iha rai okos.
Tanba ne’e nia dehan, sira presiza halo mapa no uja mapa ne’e hanesan sasukat ida atu bele identifika rekursu bee iha rai okos.
“Ne’ebe fiar katak mapa ne’e bele iha nia vantajen diak ba rai Timor, tanba mapa ne’e kuaze atu hanesan ho Australia nian,” Minister Conselhor Ashcroft hateten.
