Membru Parlamentu Nasional kestiona konstruksaun uma dormitoriu ba membru Polisia Nasional Timor Leste (PNTL) ne’ebe halo iha distritu Ermera balun laiha kualidade.
Prezidente Komisaun B (seguransa, defeza, negosiu estranjeiru), Deputadu David Diaz Ximenes, husu ba governu atu toma atensaun ba kompania ne’ebe kaer obra ne’e.
“Kompania ne’e liu konkursu ga la’e, simu tiha osan estadu nian, la’os halo uma ne’ebe iha kualidade, maibe liu fulan hira deit at fali ona, ne’e hau la konkorda,” Prezidente Komisaun B Parlamentar ne’e preokupa, iha Parlamentu Nasional.
Nia dehan, sira identifika projetu ne’e laiha kualidade bainhira sira nia komisaun ba halo fiskalizasaun iha fatin ne’ebe halo uma sira ne’e.
“Ami ba hare tiha ona, ami nia relatoriu iha, laiha kualidade, no laiha responsabilidade,” nia dehan.
Nia mos husu ba Ministeriu Defeza no Seguransa no Sekretariu Estadu Seguransa atu tun ba baze hodi hare direitamente situsaun ne’ebe akontese iha terenu.
Hatan ba preokupsaun ne’e Sekretariu Estadu Seguransa (SES), Francisco da Costa Guterres, katak nia parte bolu ona kompania no sira tenke responsabiliza ba projetu ne’e.
“Ami hapara tiha kompania ne’e no agora ami investiga hela, maibe nia iha responsabilidade atu hadia,” SE Guterres hateten.
Nia rekonese, katak husi obra sira ne’ebe halo tiha ona, iha duni uma ida deit mak laiha duni kualidade.“Ita labele jeneraliza hotu, iha Ermera uma ida deit,” nia hateten.
