Membrus Polisia Nasional Timor-Leste hamutuk 100 resin mak sei hetan reforma iha tinan 2014, tanba idade liu ona.
Sekretariu Estadu Seguransa (SES), Francisco da Costa Gutteres, hateten agora lei iha ona no hein deit estatutu polisia nian no estatutu ne’e sei lori mai iha Konselho Ministru atu aprova.
“Ita presiza hare ida ne’ebe maka tama ona iha kategoria reforma, nia tenke hetan reforma duni, iha nain 100 mak sei hetan reforma,” SE Gutteres hateten, iha Parlamentu Nasional.
Iha fatin seluk membru Komisaun B (negosiu estranjeiru, seguransa no defeza), Deputada Maria Lurdes Bessa, hateten reforma ne’e kestaun normal no tenke reforma duni membrus ne’ebe idade ona.
“Nia servisu ona iha tinan barak no nia tinan avansadu ona, nia iha direitu atu hetan reforma hodi deskansa,” Deputada Bessa dehan.
Maske sira hetan ona reforma, maibe nia dehan, governu sei iha nafatin dever atu fo nafatin osan reforma ba sira.
