Membru Parlamentu Nasional kestiona ba projetu loke estrada foun iha Suku Oeleu, distritu Bobonaro, tanba foin mak atinji kilometru lima (5 km), maske tinan rua ona hala’o projetu ne’e.
Deputadu Manuel Castro, hateten obra ne’e hahu tau osan iha tinan 2012 ho montante $32, 12 mil no hahu iha 2012, maibe to’o agora foin maka atinji kilometru lima.
“Hau la hatene osan sira ne’e ba hotu iha ne’ebe, osan $3 mil ital ne’e hela deit oituan deit ona, maibe servisu la lao,” Deputadu Manuel Castro kestiona, iha Parlamentu Nasional, Dili.
Tanba ne’e nia husu ba ministeriu kompetente atu bele responsabiliza ba obra ne’e.
“Halo didiak ba, tanba wainhira ami ba halo fiskalizasaun, realidade ne’ebe maka ami hasoru iha baze ne’e hanesan ne’e,” Deputadu Castro dehan.
Iha parte seluk Sekretariu Estadu Obras Publik (SEOP), Luis Vas Rodrigues rekonese katak obra ne’e halo demora liu ate agora seidauk hatudu rezultadu diak.
“Kompania ne’e iha duni difikuldade finanseira, e ami bolu ona kompania atu bele responsabiliza,” SE Rodrigues katak.
Nia dehan, lolos obra ne’e halo ho kilometru 20 ital husi Oeleu ba Tilomar-Suai.
“Hakarak ga lakoi sira iha duni responsabilidade atu halo hotu obra ne’e,” SE Rodrigues hateten.
