Membru Komisaun F Parlamentar (saude, edukasaun, igualidade, veteranus), husu atu halo investigasaun profunda ba prosesu sosa roo ambulansia, tanba desde sosa to’o agora la halo operasaun.
Deputada Ilda Maria da Conceicão, dehan tenke halo duni investigasaun tanba roo ne’e sosa ho orsamentu estadu nian ho kustu bo’ot $400,000.
Alem de ne’e Deputada ne’e mos preokupa kona ba roo ambulansia ki’ik ida ne’ebe to’o agora la hatene nia paradeiru, presiza halo investigasaun.
“Ami husu atu halo investigasaun ba ro ambulansia rua ne’ebe ida at ida seluk ne’ebe nia paradeiru lalos (mout ka lakon) informasaun lalos,” dehan deputada Conceicão.
Entretantu Diretor Nasional Diresaun Apoia Hospitalar no Enkaminamentu Saude, Horacio Sarmento, rekonese katak roo ambulansia foun ne’e desde sosa to’o agora seidauk halo operasuan, tanba avaria.
“Agora iha ona faze finalizasaun manutensaun, hein hela materia balun husi Surabaya,” Diretor Sarmento hateten.
Iha parte seluk, Diretora Saude Distritu Dili, Agostinha da Costa, hateten durante ne’e Polisia Maritima mak ajuda hodi halo tranferensia moras husi Atauro mai ospital nasional.
“Ami servisu hamutuk ho Polisia Maritima hodi transfere moras mai ospital nasional,” Diretora da Costa dehan.
