Projetu monta manila (bee dalan) iha estrada Colmera ne’ebe remata tiha maibe tenke sobu fali, tanba manila hirak ne’e balun as liu fali estrada.
Membru Komisaun E (infra-estrutura, transporte no komunikasaun), Deputadu Inacio Moreira, hateten bainhira sira nia komisaun ba fiskalizasaun ba iha projetu ne’e no deskobre katak manila hirak ne’e balun monta as liu fali estrada.
“Ami haree manila sira ne’e laiha kualidade, iha tipu rua mak sira uja iha ne’eba, tipu ida diak no ida la diak tanba ninia anel enkaixa tama ne’e badak liu, ne’ebe ami haruka kompania atu sobu fali, mas to’o agora seidauk,” Deputadu Moreira kestiona, iha Parlamentu Nasional.
Tuir fiskalizasaun Komisaun E nian iha terenu, nota katak montajen ba manila sira ne’e la los hotu.
“Sira kuandu monta manila sira hanesan ne’e tenke monta husi kraik para bee suli no sa’e ne’e to’o iha ninia rohan,” Deputadu Moreira dehan.
“Ita bo’ot sira hare’e deit balun sira monta iha klaran no balun monta iha ninin halo klo’ot liutan fali,” nia kestiona.
Nia dehan, lolos monta ona manila bee la’o ona, maibe realidade manila monta tiha bee la la’o nafatin.
Entretantu Prezidente Komisaun E, Deputadu Pedro dos Martires da Costa, hateten kontrusaun ne’e tenki ovedese ba regras, atu nune’e bee bele halai ho diak no labele nakfera fali iha estrada klaran.
“Altura ami ba haree, manila sira la uniforme e ida ne’e aban bainrua sei kria problema,” Deputadu da Costa hateten.
Prezidente Komisaun E ne’e hateten,atu hetan kualidade diak liutan, tenke hadi’a manila atu nune’e bele enkaixa deit.
“Iha altura ne’eba ami ejiji balun ne’ebe mak sira halo la enkaixa ba malu diak liu hasai tiha,” nia dehan.
Entretantu Diretor Nasional Servisu Sanitasaun Baziku (DNSB) iha Sekertariu Estadu Agua no Sanementu (SEAS), Joao Nazaret da Piedade Braz, rekonese maibe balun deit mak sobu tanba as liu fali estrada.
“Ami sobu la’os tanba laiha kualidade, maibe manila balun ne’e mak a’as liu fali ba Estrada,” nia dehan.
Nia hateten,projetu ne’e nia kualidade diak, tanba manila ne’ebe mak oras ne’e dadauk uja, nasaun seluk hanesan Japaun mos uja ida ne’e hodi halo bee dalan.
“Agora atu sobu ne’e 143 metrus troka fali ho manila box, maibe manila rua ne’e nia kualidade diak hotu,”nia hateten.
Nia dehan, manila ne’ebe oras ne’e dadauk uja nia pezu 2,170 ton. “Ita tau iha mota laran mos bee la lori tanba nia pezu ne’e todan liu,” nia hateten.
Projetu refere nia distansia hamutuk 586,7 metru no uja manila distansia hamutuk 305 metru.
Depois manila sira ne’e monta hotu sei uja masa cor tan 35 cm depois nahe tan alkatraun surface course sinku sentimu.
Projetu ne’e rasik kaer husi Kompania Tifoho ho durasaun durante fulan tolu nia laran, no sei remata lolos iha fulan Dezembru tinan 2013.
“Orariu ne’ebe mak ami fo ba kompanha sira mos kumpri katak to’o loron 30 Dezembru projetu ne’e tenki remata ona,”nia informa.
Total orsamentu ne’ebe mak halao ba projeitu ne’e hamutuk $ 650.000 ribu dolar ,osan ne’e tama ihaFundu Infrastrutura .
“Hau la bele dehan osan mak ne’e deit ona maibe bele mos iha mudansa orsamentu tanba depende ba ejizensia iha terenu,”Bras dehan.
Nia afirma, projetu ne’e durante ne’e ladun avansa ba oin tanba be’e sai husi rai okos sae maka’as.
“Tanba ida ne’e mak ami nia tekniku sira kalan sira servisu nafatin hodi supa sai be’e sira ne’ebe mak sae ne’e,”nia esplika.
