Prezidente Komite 12 Novembru, Gregorio Saldanha apela ba sobrevivente 12 tomak tenke hamutuk hodi hadia istoria ho lolos, atu nune’e istoria ne’e hela ho dignidade.
Nia hato’o liafuan ida ne’e, hafoin halo juramentu bad ala ikus nian ba sobrevivente sira iha edifisiu Komite 12 Novembru, iha Balide, Dili.
“Ita sei moris deit ema tenta bosok,ema tenta desvia istoria, ema tenta halo falsifikasaun sa’tan ita mate pior liu,” Prezidente Komite 12 Novembru ne’e dehan.
Nia dehan, atu hetan lia los la’os responsabilidade Komite 12 Novembru deit, maibe responsabilidade ema hotu nian atu kopera malu, hadia istoria ne’e ho dignidade.
“Tempu uluk ita nia obrigasaun mak luta no ohin estadu nia obrigasaun atu fo ita nia direitu, tanba ne’e tenke halo ho lolos, se mak merese atu hetan direitu ida ne’e?,” Saldanha hateten.
Iha fatin hanesan Sekretariu Estadu Antigu Kombatentes da Libertasaun Nasional, Julio Sarmento da Costa (Meta Mali), hateten veteranus la’os luta iha ailaran deit, maibe inklui mos vitima 12 Novembru nian.
Meta Mali dehan, tinan-tinan estadu hasai osan ba hodi selu ba veteranus no martires hamutuk $5 milioens resin iha Timor laran tomak, maibe veteranus foin mak atinji 18 .000 resin.
“Kuandu hotu sai veteranus hotu, mina rai selu ba veteranus, mina rai sei maran no nasaun sei doku tiha,” nia dehan.
Nia espera katak, sobrevivente 12 Novembru sei la falsifika dokumentus, tanba sira konese malu hela.
