Vise Primeiru Ministru, Fernando Lasama de Araújo husu ba dirijente Ospital Nasional Guido Valadares (HNGV) atu nomea porta voz ida hodi fo informasaun ba publiku kona ba servisu atendementu saude iha ospital liu husi media. 
Nia mos husu ba parte saude, atu labele taka demais, tenke ba esplika ba publiku saida mak akontese iha atendementu no prosesu tomak ne’ebe la’o.
Se la’e, nia dehan, ema ida rua bele manipula informasaun halo komunidade sira hakfodak tanba servisu saude relasiona ho ema nia vida ema presiza hatene saida mak akontese.
“Hau hateten ona ba ministru no diretor sira iha ne’e, ospital presiza iha juru bicara ida ekilibradu, labele defende an deit, maibe tenke koalia realidade ne’ebe akontese durante ne’e, labele nonok deit, koalia ba publiku,”Vise Primeiru Ministru ne’e husu, bainhira hasoru malu ho dirijente HNGV no Ministeriu Saude.
Iha tempu uluk, nia dehan, Diretor Antonio Junior Clares sempre mosu ba publiku atu esplika realidade ne’ebe akontese iha HNGV relasiona ho atendementu no prosesu tomak atu ema hotu akompania no rekonese problemas sira ne’ebe akontese hodi buka solusaun atu resolve.
Entretantu, Diretor Jeral HNGV, Domingos Soares, konkora ho hanoin ida ne’e no promete sei nomea ema ida atu fo informasaun ba publiku relasiona ho atendementu iha HNGV.
“Iha enkontru ida ne’e iha konkluzaun ikus, katak ospital tenke iha ema ida atu fo informasaun ba publiku kona ba lala’ok no atendementu iha HNGV, hodi nune’e ita bele soe tiha imagen negativu sira ne’ebe iha,” nia dehan.
