Lei Rai nian pakote tolu ne’ebe uluk iha 2012 hetan veto husi Prezidente da Republika (agora eis), Jose Ramos Horta, agora Parlamentu Nasional bele re-agenda fali, maibe sei halo debate iha tinan 2014.
Lei rai nian pakote tolu ne’e, kompostu husi Lei Espropriasoes, Lei Rejime Espesial no Lei Titularidade Bem das Moveis.
Deputadu Aniceto Longuinhos Guterres Lopes, hateten kuandu la halo debate iha fulan Outubru tinan ne’e, mak sei halo diskusaun iha tinan oin.
“Kuandu orsamentu tama ona, ne’e laiha ona plenaria, tanba deputadu sira sei debate orsamentu iha komisaun,” membru Komisaun A Parlamentar ne’e dehan, iha Parlamentu Nasional.
Nia dehan, iha Novembru debate orsamentu iha komisaun no iha fulan Dezembru mak foin debate orsamentu iha plenariu, ne’ebe laiha tempu tebes.
Iha parte seluk Vise Ministru Justisa Ivo Valenti hateten, lei rai ne’e nudar lei nebe principal, no ne’e presija parlementu hare didiak.
“Sei kuandu atu debate iha tinan oin mai, bele deit maibe antes atu tama lei seluk presija tama uluk lei rai” dehan Vise Ministru Justisa Ivo Valenti, iha nia knar fatin.
Entretantu komunidade Manuel Freitas, hateten so lolos ne’e iha mandatu foun Parlamentu Nasional foin lalais ne’e, tenke debate lei rai mak uluk, tanba iha distritu ne’e problema barak mak problema rai ne’e.
