Eskola Pre-sekundariu numeru 01 distritu Viqueque, dadaun ne’e animal sira tama arbiru deit iha eskola laran, tanba ne’e presiza harii moru protesaun ida ba eskola ne’e.
Diretor da Eskola, Agapito Martins, hateten animal sira tama to’o iha eskola laran, tanba moru laiha.
“Ami atu halo lutu mais uja lori ai deit la diak, entaun animal kontinua tama tanba ne’e mak ami nia hakarak moru permanente ida para animal hanesan karau,fahi, kuda no bibi labele tama,” Diretor Martins dehan.
Diretor ne’e realsa, dader-dader antes estudantes sira tama ba eskola tenke hamoos uluk fahi teen,karau teen no bibi teen mak foin bele tuir aprendizajen.
“Ami husu mak liu-liu moru inklui odamatan sira tenki hadia atu nune’e animal sira labele tama arbiru iha eskola laran,”Diretor ne’e rekomenda.
Diretor ne’e esplika, seguransa eskola nian iha maibe area eskola luan entaun difikulta ba sekurity atu kontrola hotu.
Nia salenta tan katak,kadiadu odamatan tenke troka, tanba iha tempu kalan ema hatama ai kesak ba kadiadu .
“Xave ami lori, ne’e loke la diak ami kadoo tiha hola fali foun,” nia esplika.
Iha fatin hanesan Estudante Florindo Pereira, katak dader –dader sira tenke halo limpeza hodi hamoos fahi teen, kuda teen no karau teen.
“Ami kadavez mai iha eskola iha area eskola oin no sala animal ten deit,”Pereira esplika.
Estudante ne’e hateten,animal sira ne’e tama arbiru deit tanba la iha moru inklui odamata eskola nian barak mak at.
“Ida ne’e mak durante ne’e ami eskola No.01 Viqueque hasoru,”Pereira hato’o.
Entretantu Adjunto Admistrador Distritu Viqueque, Jose da Costa de Sousa, hateten sira sempre halo operasaun ba animal sira no balun hetan oho, maibe komunidades mak laiha konsiensia.
“Ami la bo’ok fali ami an sira husik koko mais ami ne’e kasihan ema hakiak to’o bo’ot mak ita ba oho tiha deit ne’e mos ita sente ladun diak,”Adjunto de Sousa informa.
Nia hateten,kuandu hamamar tuir komunidade sira,komunidade sira demais fali kontinua husik animal.
“Hau hanoin moru protesaun ita bele halo maibe kuandu komunidade la iha konsiensia hanesan deit,”de Sousa katak.
Nia dehan, sira sempre tun hakilar ba komunidade sira katak hakiak animal tenke sulan.
