Polisia Tranzitu Nasional (POLTRANS) sei halo lelaun ba motor 10 ne’ebe sira prende durante tinan ida (2013) hahu Janeiru to’o agora, tanba nain sira la mai foti hafoin prende.
Komandante Tranzitu Nasional, Inspector Xefe Antonio L.C. Soares, hateten iha lei interministerial artigu 160, wainhira polisia prende motor ou kareta, prazu atu rai iha fatin polisia ne’e tenke to’o deit fulan tolu.
“Kuandu liu ona husi fulan tolu ne’e, entaun ami sei halo lelaun ba motor ou kareta ne’e,” Komandante Soares dehan, iha Kaikoli.
Nia dehan, motor hirak ne’e prende tanba karta kondusaun no dokumentus motor nian laiha.
Antes ne’e, nia afirma, husi parte polisia sei publika ba publiku, atu nune’e karik ba see deit mak iha interese, bele mai sosa.
“Ami sei konfirma ho Ministeriu Publiku, atu hare kona ba asuntu ne’e, liu-liu ba berita acara nian,” Komandante Soares katak.
Tuir nia, osan husi lelaun ne’e sei entrega ba iha kofre estadu nian.
Entretantu Deputadu Mateus de Jesus, konkorda ho inisiativa ne’e, tanba regula ona iha lei.
“Sira halo bazea ba lei, no hau hanoin nain la mai foti, entaun tenke halo lelaun,” Deputadu ne’e dehan.
Tuir nia, ida ne’e hanesan maneira ida, atu oinsa ema bele kumpri ba regras tranzitu ne’ebe iha ona, tanba dala barak ema halimar fali ho regras.
Iha fatin seluk motorista Manuel Freitas, konsidera ida ne’e diak, maibe se bele extende ba fulan hat, tanba karik iha maluk balun ne’ebe sei iha hela faze trata hela dokumentus.
