Membru Parlamentu Nasional konsidera Servisu Polisia Intelijensia (SPI) durante ne’e sei faila hela, tanba krimi ne’ebe akontese durante ne’e barak liu ho karakter krimi organizadu.
Deputadu David Diaz Ximenes, hateten problema ne’ebe foin dadauk (24/09/2013) akontese iha Marconi, joven ida hetan sona husi grupu balun e Servisu Polisia Intelijensia iha ne’ebe?
Nia dehan, servisu informasaun de operasional, sira tenke antisipa fenomenu, kualkuer fenomenu ida atu mosu, inklui ema oho malu.
“Mais wainhira krimi mosu tiha ona, entaun ne’e servisu intelijensia mak gagal,” Deputadu Ximenes kestiona, iha Parlamentu Nasional.
Tanba ne’e, nia sujere ba Polisia Komunitaria, tenke tama iha povu nia le’et, no Polisia Intelijensia tenke observa situasaun.
Hatan ba preokupasaun ne’e Komandante Operasional Nasional, Superintendente Xefe Armando Monteiro, katak instituisaun polisia ne’e foun tanba ne’e sei iha failansu oin-oin inklui rekursu humanu.
“Maibe tenta hala’o ami nia kna’ar,” Komandante Monteiro dehan, iha Kaikoli, Dili.
Kona ba kritika husi Membru Parlamentu Nasional no komunidades, nia dehan ne’e hanesan motivasaun ida ba sira (Polisia Intelijensia) bele servisu diak liu tan iha future.
“Ne’e hanesan fanu ami, tane ami, hodi nune’e ami servisu diak liu tan, detekta grupu nomos atividade krimi ne’ebe maka la’o hela iha ita nia rai laran ne’e,” Komandante Monteiro katak.
