Komunidade suku tolu entrega rai hektares 10 ho gratuitamente ba estadu atu halo eskola Referansia Portugues iha distritu Baucau.
Administrador Distritu Baucau, Antonio A. Ximenes, hateten suku tolu ne’e kompostu husi, suku Wailili, Buibau no suku Trilolo.
“Ne’e nudar komitmentu komunidade atu fo sira nia kontribuisaun ba dezenvolvementu local, katak to’o ona tempu atu sira bele dezenvolve sira nia rai moris fatin,” Administrador Ximenes dehan, iha distritu Baucau.
Nia dehan, ida ne’e sai hanesan ezemplu diak, tanba iha komunidade balun ne’ebe dala ruma hela iha rai estadu, maibe wainhira estadu presiza rai ne’e, sira laiha konsiensia atu sai.
“Sira husu fali osan iha estadu,” Administrador Ximenes katak.
Iha fatin seluk Deputada Ilda Maria da Conceicao, apresia tebes inisiativa komunidade suku tolu ne’e, entrega rai ba estadu atu halo dezenvolvementu.
“Komunidade ne’ebe iha konsiensia, katak presiza duni ona, atu sira mos fo sira nia kontribuisan ba rai ida ne’e,” Deputada husi bankada Fretilin ne’e gava.
Nia mos dehan, ne’e hanesan ezemplu ida ba komunidade seluk atu oinsa fo mos sira nia asaun no kontribuisaun diak ba rai ida ne’e.
Iha parte seluk estudante Fakuldade Direitu iha Universidade Dili (UNDIL), Stefanus Fernandes, husu ba komunidade sira ne’ebe entrega rai ba estadu, diak liu tan kompleta kedas ho sertifikadu rai nian.
“Atu nune’e bei-oan sira labele reklama no kria problema iha future,” nia katak.
