Kompania Estrada Bo’ot Diak no Eudia Karya sei uja produtu petrasoil hodi halo rehabilitasaun ba estrada sira iha Dili laran.
Xefe Kompania Estrada Bo’ot Diak, Ilidio Cardoso, hateten sira uja petrasoil ne’e tanba material foun ne’e iha duni nia kualidade.
“Timor ne’e udan bebeik no produtu ne’e bele dura udan been, atu estrada labele at lalais,” Xefe Cardoso dehan, iha Hotel Timor, Dili.
Nia dehan, produtu ne’e mos bele normaliza rai no udan been, atu nune’e udan been labele estraga estrada ne’ebe halo tiha ona ho produtu petrasoil.
Tuir planu produtu ne’e sei halo uluk testu ba estrada iha Tasi tolu, liu-liu ba estrada ne’ebe kuak ki’ik oan liu.
Iha parte seluk Deputadu Inacio Moreira, hateten atu halo estrada ho material kimiku saida deit bele, maibe importante liu maka, obra ne’e nia kualidade tenke diak.
“Ho kualidade no durasaun tenke ho tempu naruk,” Deputadu Moreira dehan.
Entretantu Ministru Obras Publik (MOP), Gastao de Sousa, hateten iha posibilidade atu uja produtu ne’e, maibe sei hare mos ba kustu husi produtu ne’e rasik.
“Sira sei uja iha Tasi tolu, hanesan experiment ida no kuandu udan ita hare to’ok produtu ne’e at ga la’e,” Ministru de Sousa tenik.
Nia mos dehan, ne’e presiza prosesu ne’ebe naruk atu uja produtu ne’e, la’os hare sosa kedas, depois halo ba laiha kualidade.
“Depois koko fali atu uja ba estrada ho kilometru lima ou hat no neen hanesan ne’e, atu nune’e ita bele garante nia kualidade, kuandu iha duni kualidade mak ita sosa, ” Ministru de Sousa katak.
