Komisario Singular ba Prosesu Disiplinar Funsaun Publika, Alexandre Corte Real, katak numeru funsionario publiku ne’ebe komete irregularidade, Ministeriu Edukasaun mak primeiru lugar kompara ho ministeriu seluk. 
Bazeia ba estatistika kazu ne’ebe Komisaun Funsaun Publika (KFP) registu, hahu husi tinan inisiu to’o ohin loron funsionario publiku hamutuk nain 300 resin mak involve an iha pratika irregularidade.
“Husi 300 resin ne’e, 80% kazu husi Ministeriu Edukasaun, tanba profesores barak no kolokasaun iha teritoriu tomak, entaun ho area izoladu sira profesores sira halo irregularidade barak, balun abandona servisu balun halo pratika violasaun seksual,” Komisario Corte Real hateten, ba jornalista sira, iha Colmera, Dili.
Alem de husi Ministeriu Edukasaun, nia dehan iha mos husi Ministeriu Saude, Ministeriu Solidariedade Sosial, Ministeriu Administrasaun Estatal, Sekretariu estadu Seguransa inklui sira seluk.
Husi 300 kazu ne’e iha kazu besik 20 pesoas mak hetan ona demisaun, balun hetan penalty hanesan reprensaun pur eskrita, suspensaun, inaktividade tuir grau gravidade kazu ne’ebe iha no iha kazu barak mos sei pendent, tanba rekursu humanu investigador minimu.
Nia hatutan, katak pratika irregularidade ne’ebe funsinario sira komete mak hanesan abandona servisu, halo violasaun seksual, korupsaun no seluk tan ne’ebe viola estatutu funsaun publika relasiona ho direitu no dever nudar funsionario publiku ida.
Alem de halo prosesu disiplinar, nia katak sira mos rekomenda ba Komisaun Anti Korupsaun atu halo investigasaun ida profunda ba funsionarios sira ne’ebe involve an iha pratika korupsaun bainhira iha ona evidensia ne’ebe forte KFP mos rekomenda ba Prokurador Jeral da Republika atu halo aprovamentu tanba relasiona ho pratika krime.
Iha oportunidade ne’e nia husu ba funsionario publiku sira esforsu makas atu hadia an nafatin hodi servi povu ida ne’e hadok an husi pratika iregularidade sira ne’e tanba funsionario ida involve pratika iregularidade barak liu sei fo disvantagen ba nia kareira hanesan lahetan promosaun entau salario la sae.
Iha parte seluk, Vise Presidente Parlamentu Nasional, Aderito Hugo da Costa, hateten KFP nudar orgaun regulador ida ba funsinario publiku ne’e sira nia kompetensia atu fo sansaun ba funsionario sira ne’ebe komete irregularidade.
“Ita tenke iha ne’e duni se lae funsionarios ria servisu estandar deit mos lahalo tama 8 oras sai 12 oras servisu regular laiha nakonu iha restorante no estradas,” dehan nia.
Nia hatutan, katak sansaun sira ne’e bele fo motivasaun ba funsionario sira atu esforsu an hadia sira nia prestasaun servisu hodi kontribui ba prosesu administrasaun publika ba rai ida ne’e.
Entretantu Ministru Edukasaun, Bendito Freitas rekuinese situasaun ida ne’e no promete sei fo atensaun makas liu tan ba funsionario sira atu bele fo apoiu positive ba andamentu no sistema edukasaun iha rai laran.
“Funsionario ne’ebe ligadu ba instituisaun governu hanesan ministerio ida espesifikamente ministerio edukasaun ami sei tau matan ami hare beibeik purzemplu iha iregularidade ne’ebe ladiak ladun fo apoiu positive ba andamentu ME no sistema edukasaun ami sei hare,” dehan Ministru Freitas.
