Kompania Timor Corp entrega makina dulas kafe kulit nian lima ba Prezidente da Republika, Taur Matan Ruak, nune’e bele fo ajuda ba grupu kafe nain sira hodi dulas sira nia kafe kulit.
Timor Corp entrega makina lima ne’e ba Xefe Estadu, tanba iha fulan kotuk liuba Prezidente Taur Matan Ruak (TMR) rasik mak husu ajuda ida ne’e ba Timor Corp.
“Senhor Prezidente hateten, katak se ita bo’ot sira iha makina fo oituan mai, porque hau ba iha distritu ema sempre ejiji hau ,” Manajer Timor Corp, Jose Vidigal hateten, hafoin entrega makina ne’e ba iha Prezidente TMR, iha Palasiu Prezidenti Aitarak laran, Dili.
Manager Vidigal realsa katak, total makina ne’ebe mak durante Timor Corp apoiu ba povu kafe nain sira hamutuk 300 resin ona, fahe ona ba iha distritu Liquisa, Ermera, Maubise,Turiscai no Laclubar.
Nia dehan, makina lima ne’e produs husi nasaun Colombia ne’ebe mak hola ho montante $2,800 kada makina ida.
“Loron ida ita bele dulas kafe to’o 10 toneladas hanesan ne’e,” Manager Timor Corp ne’e katak.
Manager Vidigal mos sente triste, tanba makina balun ne’ebe uluk fo tiha ba iha kafe nain sira, agora balun halo fali negosiu ho makina ne’e.
Tuir nia, makina ne’e Timor Corp oferese ho gratuita ba grupu kafe nain sira atu nune’e sirs bele dulas sira nia kafe kulit, maibe komunidade balun halo fali ba negosia.
Iha fatin hanesan Prezidenti Republika Taur Matan Ruak, hato’o agradese ba Timor Corp ne’ebe apoia ona makina ne’e.
“Obrigadu barak ba ita bo’ot sira nia kooperasaun fo apoiu makina sira ne’e ba ita nia populasaun,” Xefe Estadu TMR agradese.
Iha sorin seluk agrikultor kafe husi distritu Ermera, Serafin da Costa katak, Ermera kafe barak maibe difikuldade ne’ebe mak durante sira hasoru mak makina laiha atu dulas .
“Ami durante ne’e uja deit manual mak dulas kafe kulit sira ne’e ,” da costa dehan.
Tanba ne’e nia husu ba estadu no governu atu fo apoiu makina dulas kafe kulit nian ba sira atu nune’e bele dulas sira nia kafe.
