Sekretariu Estadu Politika Formasaun Profesional no Empregu, Ilidio Ximenes da Costa hateten, sira sei halo peskiza ida kona ba asuntu trabalhu infantile ne’ebe dadaun ne’e buras iha rai laran, hodi identifika labarik nain hira mak involve iha atividade ne’ebe fo perigu ba sira nia future ne’e.
Sekretariu Estadu ne’e dehan, dadus ne’e importante, nune’e bele halo planu hodi kombate trabalhu infantile iha rai laran.
“Dadus mak sai faktus ba ita atu halo planu no asaun, ne’ebe ida ne’e hanesan papel bo’ot ida ba iha SEPFOPE, ami mos komesa hahu hanoin kona ba sistema dadus ne’e,” SE da Costa tenik, bainhira partisipa iha selebrasaun loron mundial ba trabalhu infantile, (12/06), iha Lecidere, Dili.
Nia rekonese, katak iha labarik barak mak sei moris iha luron ibun no balun mos ajuda inan aman halibur rai henek iha mota laran tanba fator ekonomia.
Nia hatutan, ne’e papel governu nian atu halo asaun konkreta ida hodi kombate situasaun ida ne’e, asegura sira nia direitu nudar futuru nasaun nian, e mos tanba governu ratifika ona konvensaun internasional no iha lei do trabalho mos bandu ida ne’e.
Tanba ne’e nia promote, katak iha tinan 2014 governu sei tau orsamentu ketak ida hodi halo kampania sosializasaun informasaun ba iha nivel baze, husu ema hotu nia kontribuisaun atu kombate situasaun ida ne’e.
Entretantu Prezidente Komisaun Nasional ba Direitu Labarik (KNDL), Komisaria Adalgiza Ximenes, katak ate agora komisaun mos laiha baze de dadus ida kona ba labarik servisu iha luron ibun, tanba seidauk halo survey kona ba asuntu ne’e.
“To’o oras ne’e ita hare labarik barak mak hala’o servisu, maibe ita lahatene labarik sira ne’e servisu tanba situasaun ekonomia ka inan aman mak haruka ou iha kauza seluk, ita seidauk identifika lolos,” Komisaria Ximenes katak.
Tanba ne’e,nia dehan, baze dadus ne’e importante tebes atu hatene kauza husi labarik sira hala’o servisu hanesan fa’an sasan, agrikultura nian, hein animal no seluk tan, nune’e bele fo atensaun espesifiku liu tan.
Komisaria mos apela ba ema hotu atu respeita labarik sira nia direitu, tanba sira servisu ho idade ne’e ki’ik fo impaktu ba sira nia saude no seguransa.
Iha parte seluk, Reprezentante Sosiedade Sivil ne’ebe servisu ba area protesaun labarik, Honorio Almeida apresia ho inisiativa ida ne’e, no sira pronto atu ajuda.
“Ita la’os hare kuantidade hira mak involve, maibe importante mak governu presiza hanoin intervensaun saida mak ita halo atu elimina situasaun ida ne’e,” Almeida dehan.
