Atu minimize numeru afetadu virus HIV/SIDA daet barak liu tan iha rai laran, governu liu husi Ministeriu Saude (MS) servisu hamutuk ho Sosiedade Sivil ne’ebe durante ne’e fo atendementu ba vitima moras hamate ne’e, presiza fo informasaun ne’ebe diak ba komunidade sira, nune’e sira mos bele iha konesementu no bele hado’ok aan husi moras at ne’e.
Tanba tuir Diretor Klinika Bairo-Pite (KBP), Doutor Daniel Murphy, katak durante ne’e ema barak mak afetadu moras ne’e tanba falta informasaun.
“Fo edukasaun no sensibilizasaun ba ema hotu atu iha konesementu kona ba HIV tuir siensia moderna tanba HIV/SIDA buat foun, ema tenke ser aprende, estuda halo tuir regras ne’ebe iha,” dehan dr. Daniel Murphy, (29/11), iha Bairo-Pite, Dili.
Doutor ne’e rekonese katal durante ne’e MS estabelese duni ona Volunteer Aconciliamentu Testu (VCT) ba pasiente sira ne’ebe afetadu virus ne’e iha Sentru Saude hotu, maibe komunidade sira la ba vizita fasilidade saude tanba informasaun ne’ebe to’o ba sira la klaru.
Sira esforsu an hodi hetan apoiu finanseiru husi doadores sira atu hola aimoruk Antiretroviral maske la kompletu maibe sufsiente atu fo atendimentu ba ema sira ne’e, maibe preokupa mos tanba laiha organizasaun ida ne’ebe bele akompanha pasiente hodi hemu aimoruk ho rutina.
“Hemu aimoruk dala ida ka rua deit bele fo ameasa bo’ot ba sira nia vida moris, tanba ne’e hau husu ema hotu atu hanoin nia konsekuensia, labele halo buat ruma taka matan ba deit tanba HIV/SIDA labele kura tenke hemu aimoruk to’o vida tomak,” Doutor Dan husu.
Total pasiente afetadu virus HIV /SIDA ne’ebe agora dadaun halao hela tratamentu iha Klinika Bairo Pite hamutuk ema 50 resin, kompostu husi mane no feto (igual), e numeru ne’e bele aumenta tan bainhira ema hotu iha konsiensia atu halo teste ba sira nia an katak sira afetadu virus ne’e ka la’e.
Iha parte seluk, Diretora Nasional Saúde Comunitaria, Isabel Maria Gomes hateten Ministeriu Saúde hamutuk ho parseirus hotu sei esforsu maka’as hodi hadia sistema promosaun saúde, liu-liu programa sensibilizasaun, edukasaun prevensaun epidemia ne’ebe fo ameasa ba dezenvolvimentu rai laran hanesan HIV/SIDA, Hepatitis B no seluk tan liu husi meus oioin hanesan liu husi media, dialogu ho komunidade.
“Hau hanoin ami hahu iha tinan 2003 to’o fulan Julho 2012 ami identifika 294 kazus mak positive HIV/SIDA liu husi testu laboratorio ne’e provizoriomente sei identifika barak liu tan iha fulan hirak mai bainhira ema ida-idak iha konsiensia atu mai halo teste ba sira nia estatus, numeru sei aumenta maka’as liu tan tanba dadus ne’ebe ami hetan ne’e kebetulan deit mak identifika,” dehan Diretora Gomes. 
