Ba futuru Governu presiza kria Lei espesifisiku ida ba Trabalhu Domestika (TD), nune’e bele regula sira nia direitu hanesan mos ho sira seluk, tanba iha lei do trabalho N.◦ 4 /2012 la iha artigu ida atu fo protesaun masimu ba sira.
“Lei ne’e foin promulga no vigor iha 22 fulan Junu ho ida ne’e ami mos sei halo preparasaun barak inklui mos sosializasaun ba lei n.◦ 4 /2012 atu komunidade sira kompriende didiak, nune’e bele halo fali lei oan ne’ebe ami sura iha 18, presiza halo atu kompleta lei trabalhu,” dehan Diretor Jeral Sekretariu Estadu Politika Formasaun Profesional e Empregu, Jacinto Gusmão, iha Balide, Dili.
Nia hatutan, SEPFOPE servisu hamutuk ho Organizasaun Internasional ba Trabalhador (ILO) no tinan oin mai bele kria lei oan ne’ebe presiza atu halo hodi kompleta implementasaun Lei Kodigu Trabalhu ne’e.
Tuir nia, difisil oituan atu proteje Trabalhu Domestika sira, tanba barak liu mak hela metin iha empregada sira nia uma durante servisu, tanba ne’e presiza duni kria lei espesial ida ba sira.
Iha parte seluk tuir Sekretariu Jeral (SJ) Konfederasaun Sindikatu Timor-Leste (KSTL), Rigoberto Monteiro katak, presiza duni Governu kria lei espesifiku ida atu preve direitu TD sira nian tanba iha lei kodigu laboral n.◦ 4 /2012 artigu 2 alina 3 koalia kona ba trabalhu domestika sei regula ho lei espesifiku ida.
“Hau nia hanoin tenke hare duni ida ne’e tanba iha lei kodigu trabalho laiha artigu ida preve trabalhu domestika sira nia direitu maske sira mos trabalhadores,” sujere SJ. KSTL ne’e.
