“Ami nia eskola durante ne’e bee la iha, dader-dader ami tenke leba bee iha bee matan ho distansia kilo metro rua husi ami nia eskola, mai fali mak foin tama eskola,” preokupa Estudante Guido Pereira, foin lalais bainhira kuru hela iha bee matan Waihe, iha Venilale, Baucau.
Konsekuensia husi falta bee moos iha eskola ne’e, estudante tenke lakon materia balun ne’ebe lolos sira simu iha parte dader, tanba ne’e husu ba governu atu toma atensaun ba kestaun ne’e.
“Ami gasta tempu deit ba leba bee,” Estudante ne’e lamenta.
Preokupasaun hanesan mos hato’o husi Estudante ne’ebe mak lakohi publika nia identidade ba publiku, kestiona katak, durante ne’e estadu la tau matan ba sira nia eskola.
“Ami nia eskola ne’e araska los ba bee tanba ne’e mak hau hakarak husu ba Governu pelomenus dada netik bee ba iha ami nia eskola ne’e,” Estudante ne’e husu.
Entretantu Deputadu Manuel Castro nudar Venilale oan hateten, proposta barak mak hatama ona ba iha Governu maibe la iha respostas.
“Ita hein to’ok Governu, aban bain rua komesa ona sira nia programa sira tau as ba programa ne’e ga lae,” Deputadu Castro espera.
Alende ne’e, tuir nia, infraestrutura ba eskola ne’e rasik la iha kondisaun ne’ebe mak diak “Sira nia uma didin ne’e mos hanesan tinan uluk estudante sira ida-idak halo deit,” Deputadu ne’e informa.
“Em jeral iha sub-distritu Venilale tomak laiha fasilidade saude, Polisia mos la hetan bee tanba durante ne’e hein deit bee ne’ebe mak mai husi foho mundu perdidu,”.
Enkuantu bainhira asuntu ne’e konfirma iha Diretor Jeral Agua e Saneamentu, Joao Jeronimo dehan ne’e responsavel Ministeriu Edukasaun nian.
“Karik sira presiza ami nia ajuda ami ba, maibe ami labele tama ba iha eskola,”diretor Jeronimo dehan.
