“Hahu husi fulan Abril to’o Junu tinan ida ne’e ita identifika labarik idade (< 5) afeta moras HIV/SIDA na’in rua no se ita sura husi tinan 2003-fulan Julhu tinan ida ne’e iha 17 kazus, ida seluk husi idade 5-14 identifika iha 11 kazus, iha nain 7 mak tuir tratamentu Antiretroviral (ARV), no nain lima mak mate ona,” informa Xefe Gabinete Sistema Informasaun Ministeriu Saude, João P. A da Silva, (17/08) iha Salaun Vila Verde, Dili.
Iha fatin hanesan Sekretariu Jeral Komisaun Nasional Luta Hasoru HIV/SIDA (KNLHS), Rui de Carvalho hateten labarik hirak ne’ebe afetadu virus ne’e maioria hetan husi inan ne’ebe positivu bele hadaet ba oan bainhira moris nune’e mos bele liu husi susu been inan nian.
“Hau husu ba media sira atu interpreta lolos liafuan ida ne’ebe dehan inan ba oan ne’e signifika katak inan ne’ebe positivu HIV/SIDA bele transmite ba oan la’os inan ne’ebe negativu,” dehan SJ Carvalho.
Nia hatutan, nudar sosiedade sivil sira sei nafatin kopera ho governu liu-liu Ministerio Saúde atu nafatin halo advokasia ba komunidade sira, liu-liu inan isin rua sira ne’ebe positivu HIV/SIDA atu prevene sira nia oan husi virus hodi halo tratamentu ARV iha ospital bainhira isin rua.
