“Ami hakarak bele hari ona maibe desizaun bainhira mak atu harii ne’e kompetensia governu nian,” informa Gregorio Saldanha,Kordenador Komite 12 Novembru, semana kotuk iha Balide, Dili.
Tuir nia, komite laiha kompetensia atu deside bainihra los mak harii monument ne’e maibe hein desizaun husi governu liu-liu kona-ba data fiksu ba planu ne’e.
Entretantu Deputadu bankada Fretilin, Inacio Morera hateten, parlamentu aprova ona orsamentu 2010 nian hodi halo estudu viabilidade ba planu harii monument ne’e.
“Governu tenke kumpri ninia promesa tanba sira dehan antes dia 12 de Novembru ne’e monument ne’e tenki pronto ona, ne’ebe ita hotu hein de’it,” nia dehan.
Moreira mos kestiona kona-ba dezenu ne’ebe uluk komisaun eventual 12 Novembru hala’o liu husi konkursu halo dezenu monument maibe lahatene agora nia parovasaun to’o iha ne’ebe.
“Orsamentu ba planu ne’e, se hau la sala atu halo estudus viabilidade ne’e 50 mil dolares Amerikanu,”.
Enkuantu Deputadu Joaquin Amaral hateten, kustu atu halo monument 12 Novembru seidauk klaru tanba osan balun ne’ebe aloka ne’e atu halo konsepsaun, estudus viabilidade nomos atu halo dezenus preliminary.
Tuir nia,liu husi dezenu no levantamentu mak “ ita foin bele hatene projetu ne’e nia valor konstrusaun ne’e hira ne’ebe hau hanoin planu harii monument ne’e sei iha prosesu nia laran e hein katak tempu oin mai se Governu hetan ona nia kustu hira bele hahu ona nia konstrusaun fiziku,” nia dehan.
