Diretor Ezekutivu Organizasaun Luta Hamutuk (LH), Jose da Costa husu ba governu foun mai iha responsabilidade atu kontinua projetu Zona Ekonomia Espesial Sosial Merkadu (ZEESM) hodi sai hanesan investimentu ba povu Timor –Leste, liu –liu povu Rejiaun Administrative Especial Oe-Cusse -Ambeno (RAEOA).
Nia dehan, dezenvolvimentu iha Oe-Cusse iha progressu no diferensia bo’ot, maske la’os ema hotu mak hetan benefisio husi dezenvolvimentu sira ne’e, maibe iha mudansa.
Nia hateten, dezenvolvimentu ne’ebe la’o iha Oe-Cusse liu –liu infra-estrutura fizika sira tuir duni gastus ne’ebe iha.
“Importante kolabora malu hodi kontinua dezenvolvle rai ida ne’e, liu –liu ZEEMS atu sai mos ezemplu ba iha munisipio seluk,” nia hateten iha servisu fatin Farol, Dili.
Nia hateten, konstituisaun RDTL konsidera ZEEMS hanesan autoridade autonomia ida, entaun governu ne’ebe deit mak mai tenke kontinua projetu ne’e.
Nia sujere, ba governu foun atu troka lideransa ba RAEO tenke bazeia ba razaun ruma, la’os tanba diferensia partido politiku.
Iha parte seluk, komunidade Oe-Cusse Yasinta Lujina rekonese dezenvolvimentu fiziku iha progressu bo’ot liu –liu estrada, ponte atu fasilita movimentu komunidade sira nian atu halo atividade negosio ho diak, tanba uluk ponte laiha dificulta sira nia atividade.
“Hau sente orgulho no previlejiu tebes, tanba Oe-Cusse hetan oportunidade hodi dezenvolve kompara ho munisipio seluk, maibe dezenvolvimentu ne’e tenke inklusivu hanesan ba ema hotu,” nia hateten
Nia hateten, iha prosesu dezenvolvimentu sempre iha impaktu negative no positive. Positivu mak povu bele iha ona kondisaun hodi fasilita sira nia atividade lor-loron no negativu mak povu sira tenke muda sai husi hela fatin, lakon rekursu importante sira (ai oan no produtu ne’ebe sai fonte ba rendimentu) tanba atu halo dezenvolvimentu.
Nia dehan, povu iha responsabilidade atu kontribui ba iha prosesu dezenvolvimentu iha rai laran, maibe tenke trata ema ne’ebe afeita ba dezenvolvimentu ne’e ho dignu hanesan umanu.
Nia hatutan, kestaun seluk ne’ebe presiza konsidera mak fo oportunidade ba iha komunidade local atu sai autor ba prosesu dezenvolvimentu ne’ebe la’o iha Oe-Cusse laran.
Nia dehan, hanesan komunidade local la ejiji atu dezenvolvimentu ne’ebe lao tenke esklusivu ba povu Oecusse, maibe importante kria koperasaun servisu ne’ebe diak entre ema local no estrangeiru sira hodi bele transforma matenek ba malu iha tempu hanesan.
Nia mos, husu governu foun mai atu kontinua dezenvolve Oecusse sai hanesan indikador ida ba nasaun Timor –Leste.
