Joven nain 3000 resin halibur aan iha organizasaun Cruz Vermelha Timor –Leste (CVTL), ho voluntario hala’o asaun humanitarian, ajuda komunidade vulneravel sira ne’ebe presiza tulun.
Prezidente CVTL, Jose Pereira da Conçeicão hateten sira iha voluntario hamutuk 3000 resin no membru nain 350 resin mak durante ativu hala’o servisu humanitarian iha komunidade.
Nia esplika, voluntario katak joven sira ne’ebe fo sira nia tempu atu hala’o servisu sira no membru mak ema sira ne’ebe kada fulan tenke tau osan (kouta) ho montante diferente 0,50 cent, $5, $25 no sira iha direitu atu kandidata an ba iha presidente CVTL nasional no munisipio sira.
Nia dehan, antes voluntario sira ne’e tun ba baze ajuda komunidade sira, joventude sira ne’e hetan ona formasaun no kapasitasaun husi organizasaun kona ba servisu humanitarian no abilidade iha lingua inklui kuinesementu jeral ba saude publika nian.
“Dala barak ema dehan, joven sira agora laiha karakter ne’ebe diak, maibe ba hau joven sira iha karakter ne’ebe diak, importante presiza ema ruma liu –liu organizasaun sira atu orienta sira ba dalan ne’ebe diak liu,” nia hateten iha edifisio nasional CVTL, Dili
Nia dehan, CVTL iha mandatu importante ida mak orienta joven sira sai joven ne’ebe humanism, iha hanoin ajuda ema seluk ne’ebe presiza.
Nia informa, tinan kotuk CVTL asina ona Memorandum of Understending (MoU) ho Ministerio Edukasaun e Kultura atu estabelese voluntario Cruz Vermelha eskolar nian.
Nia hateten, voluntario sira nia papel mak atu fo edukasaun saude higiene ba komunidade sira no eduka komunidade sira moris saudavel.
“Ita iha voluntario barak, dezastre ruma sei la hasai despeza bo’ot, salva ema barak nia vida, maibe voluntario menus ema hotu hanoin servisu tenke iha osan ita nunka la’o ba oin,” nia hatutan
Alende halo edukasaun no sosializasaun ba komunidades, sira mos iha projeitu dada bee mos ba komunidade sira iha area rural, ne’ebe fundus mai husi doadores hanesan Movimentu Cruz Vermeilha Mundial no governu rasik.
Iha parte seluk, Joventude Gertrudis Oematan hateten Cruz Vermelha hanesan mahon ba foinsa’e sira atu buka siensia no forma sira sai joven ne’ebe iha karakter humanismu.
Nia dehan, mundu ohin loron joven sira presiza tebes orientador ne’ebe diak atu fo orientasaun ne’ebe ba sira hodi sai joven ne’ebe respeitu ema seluk, humanismu no hanoin luan.
“Hau sente Cruz Vermelha hanesan fundasaun ida ne’ebe prepara joven sira ba futuru ne’ebe diak no eduka joven sira atu halo asaun humanitarian liu –liu ajuda ema seluk ne’ebe hetan susar,” nia hateten.
Nia apresia, ho servisu CVTL nian ne’ebe mobilize komunidade liu –liu joven sira atu voluntariamente fo ran regular hodi tulun maluk sira ne’ebe presiza liu –liu inan feto sira, ne’e asaun ne’ebe nia valor bo’ot tebes.
