Diretora Servisu Autonomia Medikamentus e Ekipamentus (SAMES), Odete Maria Freitas Belo hateten kompania hatama ona aimoruk items 45 e agora dadaun iha ona armajen SAMES nian, aimoruk barak mak seidauk inklui aimoruk espesifiku balun.
Nia dehan, items aimoruk hira ne’e hatama husi kompania ESCO, EDI no Soulth Australia no aimoruk hirak ne’e mak aimoruk fuan, matan, kulit no seluk tan iklui alcohol no reajente.
“Aimoruk sira ne’e tama fazeadamente, tanba kompania sira ne’e la’os fabrika aimoruk entaun sira tenke koordena fali ho fabrika, bainhira aimoruk seidauk prontu, tenke hein,” nia hateten, iha nia knara fatin Kampo Alor, Dili.
Aimoruk ne’ebe tama ona iha armajen, bainhira fasilidade saude sira husu, nia dehan bele halo distribuisaun enkuantu sira ne’ebe seidauk tama (stok out) ne’e sei koordena fali ho kompania farmasia sira iha rai laran hodi hatama.
Nia informa, durante halo inspesaun ba kuantidade no kualidade aimoruk sira ne’ebe tama mai, laiha items ida mak rejeita tanba aimoruk hirak ne’e iha kualidade diak.
Atu antisipa stok out iha fasilidades saude, nia hateten governu asina ona akordu (standing Offer Agremeent) ho kompania farmasia lokal hat: hanesan Istana Farma, Foho Osan Mean, Moris Foun no Farmazes hodi responde ba situasaun ida ne’e.
Alende ne’e, SAMES mos halo hela avaliasaun dokumentus ba kompania internasional balun hodi asina mos akordu atu responde ba iha situasaun ida ne’e, tanba aimoruk balun kompania lokal sira labele hatama.
Antes ne’e, dotor espesialista matan Marcelino Correia hateten iha sentru matan aimoruk steroid laiha, e pasiente ne’ebe halo operasaun sira tenke ba sosa iha klinika privadu sira.
“Operasaun ba matan katarak nafatin la’o, agora hakarak lakohi sira tenke ba sosa aimoruk atu tau ba sira nia matan tanba ita labele hein deit bainhira mak iha,” nia hateten.
Nia dehan, aimoruk steroid ne’e importante tebes ba pasiente matan ne’ebe halo operasaun atu prevene infeksaun depois operasaun tanba ne’e tenke pasiente sira tenke sosa.
