Governu loke ona uma provizorio ba ema moris ho virus HIV atu deskansa no oferese oportunidade ba sira hodi tuir formasaun hodi hakbi’it abilidade sira iha negosio ki’ik.
Sekretario Ezekutivu Komisaun Nasional Luta Kontra HIV/SIDA Timor-Leste, Daniel Marçal hateten uma ne’e hanesan mahon ida ba sira atu deskansa ho hakmatek bainhira sira hasoru stigma no diskriminiasaun husi familia no sosiedade.
Nia dehan, lolos espasu ne’e la’os hela permanente maibe tama iha pasiente balun ne’ebe familia lasimu sira no sira sente seguru no hakmatek hela iha uma mahon ne’e, hela to’o familia simu hikas sira.
“Sira ba iha ne’eba la’os ba deskansa los deit, maibe iha atividades hanesan homan, tein aihan local no aprende muzika ne’ebe sira balun fila ba sira nia fatin, sira iha ona abilidade atu halo buat ruma,” nia hateten, iha servisu fatin Pantai Kelapa, Dili.
Nia hatutan, iha munisipio Baucau iha ona grupo ida ne’ebe dezenvolve aan ona iha atividade homan iha sira nia fatin, hodi fa’an fali hetan osan ba sustenta sira nia moris.
Ho numeru ne’ebe tama sai iha uma mahon, nia dehan sei iha stigma no diskriminasaun ba ema sira ne’ebe moris ho HIV husi sosiedade no familia.
Nia dehan, esperiensia ne’ebe iha pasiente balun mate la’os tanba HIV ka SIDA, maibe hanoin barak ho liafuan maka’as ne’ebe familia no sosiedade sira fo ba sira.
“Komunidade, familia balun seiduak pronto kuandu nia familia ida hetan HIV, liu –liu sira ne’ebe hetan HIV ho idade adulto, sei idade eskola,” nia hateten.
Iha parte seluk, Jerente Programa Organizasaun Esperansa Inacio Maria hateten stigma no diskriminasaun sei aas tanba komunidade inklui familia barak mak seidauk komprende diak kona ba lala’ok transmisaun virus HIV.
Nia dehan, atividade edukasaun prevensaun ne’ebe komisaun halo iha rezultado ne’ebe diak tanba ema barak mak iha ona konsiensia atu halo teste ba sira nia aan, tanba ne’e dadus kada loron aumenta, maibe presiza
habelar liu tan ba komunidade hotu.
“Kampanha komisaun halo iha deit distritu no sub-distritus, ba aldeia sira iha area rural ne’e seidauk liu –liu iha Suai perbatasan ho Indonesia ne’e to’o agora ema la komprende saida mak HIV no AIDS,” nia hateten.
Nia dehan, durante ne’e sira servisu halo edukasaun prevensaun ba iha grupo risku sira hanesan Mane Seksual Mane (MSM) no seks workers tenke uza kondom bainhira halo relasaun, tanba sira nia servisu mak ida ne’e.
Entaun, nia konsidera uma mahon ne’e diak tanba fo espasu ba pasiente sira bele deskansa ho hakmatek, liu –liu sira ne’ebe hasoru problema stigma, diskriminasaun.
