Hafoin simu halo juramentu membrus parlamentu 65 IV legislatura liu husi elisaun sekretu hili deputado Aniceto Longuinhos Guterres Lopes hodi lidera orgaun legislatura durante periodu 2017-2022.
Iha diskursu primeiru presidente eleitu promete sei hadia mekanismu servisu parlamentar nian intermus administrasaun, fiskalizasaun no aprovasaun leis sira hodi asegura kualidade servisu parlamentar nian hanesan orgaun legislasaun no fiskalizasaun ba programa governu nian.
“Hau sei kaer metin responsabilidade ida ne’e, los duni hau deputado husi partido FRETILIN, partidu ne’ebe hau hadomi no hakuak, maibe hau promete atu sai duni presidente ba parlamentu tomak, laos ba bankada, grupo parlamentar ruma no koligasaun balun deit iha Uma Fukun ida ne’e,” nia hateten iha plenaria.
Nia dehan hanesan jerasaun foun sei tau konfiansa ida ne’e ho responsabilidade ida ne’e hodi servi nasaun no povu Timor–Leste tuir konstituisaun da Repbulika Timor–Leste (RDTL) no regiment interna parlamentu nian.
Nia hatutan nia parte mai ho agenda ida ne’ebe proprio kompostu husi programa oioin ne’ebe sei halao durante nia mandatu. Programa sira hanesan reforma administrasaun parlamentar, intensifika servisu fiskalizasaun no kontaktu eleitores, halo estudu ba iha implementasaun leis no halo harmonizasaun ba leis tanba lei barak mak demaziadu no dezaktualizadu.
Maibe nia rekuinese atu halao servisu sira ne’e presiza servisu makas membru parlamentu sira hotu no apoiu husi instituisaun relevante sira hotu atu halo parlamentu ida ne’ebe transparensia, akontabilidade no efetivu.
Nia hatutan Timor–Leste sei infrenta problema oioin hanesan mukit, falta empregu no problema social seluk tanba ne’e presiza orgaun soberania hotu inklui instituisaun religiosa, sosiedade sivil, universitario no sidadaun sira atu hamutuk hodi buka solusaun ba problema sira ne’e.
“Hanesan presidente parlamentu national hau promete atu promove dialogu permanente hodi buka intendimentu klean no hetan konsensus masimu posivel entre partidu politiku sira, sen hamate kritiku deputado ida–ida nian,” nia hatutan.
Alende ne’e nia dehan odamatan parlamentu nakloke ba sidadaun hotu ne’ebe hakarak hato’o sira nia petisaun liu–liu sosiedade sivil, relijiaun no partidu politiku ne’ebe laiha asentu ne’ebe hakarak kontribui buat ruma ba iha esersisio ne’ebe lao iha parlamentu laran.
Nia informa durante mandatu sei husu xefe governu ho membru governu sira atu halo anunsio ba medidas politika ba ezekusaun programa governu nian rutina ba iha parlamentu liu husi plenaria no iha oportunidade hanesan bele responde mos ba problema autal sira ne’ebe povu infrenta.
Iha parte seluk, Diretur Ezekutivu Forum Organizasaun Non Govermental Timor –Leste (FONTIL) Arseino Pereira kongratula presidente parlamentu eleitu no apresia ba inisiativa halo dialogu nakloke ho sidasaun sira.
Nia dehan sosiedade sivil sei sai parseiru mutua parlamentu nian hodi hare ba iha orsamentu jeral do estado, ezekusaun no leis ne’ebe iha tanba organizasaun sempre halo submisaun ba parlamentu kona ba kestaun sira ne’e.
“Ita rona iha diskursu presidente hateten nakloke ba sidadaun hotu ne’e signifika fo korajen ba iha sosiedade sivil no instituisaun hotu atu hakbesik an ba malu hodi dezenvolve rai doben Timor–Leste,” nia hateten.
Nia dehan iha kestaun balun ne’ebe parlamentu ida ne’e tenke hadia husi legislasaun sira liu ba mak pontualidade tanba pontualidade ne’e importante tebes atu bele halo servisu ruma liu–liu diskusaun no aprovasaun leis ho pontual no kualidade.
