Taxa kazu sivil hanesan abandonu familia no divorsio kada tinan registu maka’as iha tribunal, tuir observasaun husi organizasaun Asistensia Legal ba Feto no Labarik (ALFeLa) iha tribunais.
Total kazu sivil ne’ebe ALFeLa fo asistensia durante tinan 2016 hamutuk 39. Husi dadus ne’e maioria kazu direitu ba alimentasaun no divorsio.
Diretora ALFeLa, Merita Correia hateten ikus-ikus ne’e kazu abandonu sa’e maka’as liu, tanba kauza husi adulteiro (perselingkuhan) ne’ebe halo husi la’en inklui mos fen.
Nia dehan, ho volume ne’ebe iha bolu atensaun ba iha entidades hotu liu –liu ukun nain sira atu haree kestaun ne’e hodi prevene, tanba nia efeitu bo’ot tebes ba futuru nasaun nian.
Tanba tuir nia, nasaun forte bainhira familia forte, entaun familia iha papel importante tebes hodi kontribui ba dezenvolvimentu nasaun ida nian.
“Adulteiro ne’e nia efeitu bo’ot liu ba ita nia oan sira,” nia hateten, iha Vila-Verde, Dili.
Alende ne’e, nia dehan fo mos oportunidade ba ema atu halo korupsaun bainhira iha nai ulun ida mak komete aktu ida ne’e.
Iha parte seluk, Diretora organizasaun Forum Komunikasaun Feto Timor –Lorosa’e (FOKUPERS), Marilia Alves hateten adulteiro sai mos fator prinsipal ida ba iha violensia domestika.
“Kauza ikus –ikus ne’ebe hamosu violensia mak problema adulteiro (perselingkuhan),” nia hateten.
Tuir esperiensia ne’ebe sira hetan husi vitimas violensia domestika mak, nia dehan dalabarak bainhira iha perselingkuhan entaun komesa mosu problemas inklui mos violensia.
Nia hatutan, problema adulteiro barak akontese liu husi relasaun amizade ne’ebe iha media social hanesan facebook no seluk tan.
