Ministerio Saude (MS) servisu hamutuk ho Ministerio Edukasaun (ME) fo formasaun kontinuasaun ba iha fornesedor ba programa merenda eskolar iha teritorio tomak.
Xefe Departamentu Vigilansia e Sanitaria Ministerio Saude, doutora Tomasia de Sousa hateten sira fo ona formasaun ba fornesedores iha eskola 3000 resin iha teritorio tomak, e barak mos seidauk.
Nia dehan, formasaun orientasaun kona ba oinsa prepara hahan ne’ebe seguru no saudavel ba labarik sira ne’e importante tebes ba iha fornesedores, nune’e labele lori fali moras ba labarik sira bainhira konsume.
“Labarik sira ne’e vulneravel tebes bainhira kuandu microbios balun tama iha sira nia isin, ne’e perigu tebes tanba sira nia imunidade ladun diak, entaun fasil hetan moras,” nia hateten, iha nia servisu fatin Kaikoli, Dili.
Alende fornesedores, nia dehan fo mos formasaun ba diretores eskola no diretores edukasaun munisipios hodi hasa’e sira nia konesementu kona ba hahan higiene no saudavel, nune’e sira bele fahe fali ba fornesedor sira
seluk ne’ebe siedauk hetan oportunidade.
Iha parte seluk, fornesedor merenda eskolar ensino Filial Rumbia, Maria de Jesus hateten susar ba sira atu implementa tuir saida mak sira hetan iha formasaun tanba kondisaun liu –liu bee moos no kondisaun dapur ne’ebe
klo’ot.
Maibe, nia dehan hahan ne’ebe sira prepara ba labarik sira ne’e moos no saudavel tanba sira uza produtu local hanesan na’an karau no modo fresku sira ba menu merenda eskolar.
“Kada loron, ami gasta $190 hodi sosa modo no fos, tanba fos husi ministerio seidauk mai,” nia hateten.
Enkuantu, nia dehan loron ida sira tein dala tolu (dader, meudia no lokraik) tanba estudante sira tama faze tolu.
Nia hatutan, tuir menu husi Ministerio Edukasaun ne’ebe fo ba eskola sira, katak husi Segunda to’o Sexta, estudante sira han etu ho modo (na’an), mie goreng ho etu, kolak no es frutas (buah).
“Ami kompras tuir osan ne’ebe iha, kuandu sasan folin baratu, ami sente diak maibe folin sa’e, ami araska oituan atu hola,” nia hateten.
Entretantu, Jerente Programa TLCE Matias dos Santos, hateten programa merenda eskolar nafatin sai problema tanba la refleta objetivu ne’ebe iha, katak hasa’e nutrisaun ba labarik sira.
“Ami rekomenda katak kria merenda eskolar ne’e labele dehan tein fo han mak importante, maibe tenke haree kualidade hahan nian,” nia hateten.
Nia mos, preokupa kona ba kondisaun dapur iha eskola sira atu prepara hahan ne’ebe higiene no saudavel ba labarik sira.
