Movimentu Universitario Timor –Leste (MUTL) hala’o segundu asaun demonstrasaun hodi kontra rezulusaun Parlamentu Nasional kona ba lelaun kareta parlamentu ho marka Prado ne’ebe membru parlamentu III legislatura sira uza ho folin $8 mil kada kareta.
Tuir estudante sira, katak rezolusaun ida ne’e benefisia deit ba membru parlamentu nasional sira, tanba kareta ne’e sosa ho folin $63 mil, e agora halo lelaun ho folin $8mil deit.
“Ami husu atu kansela lalais rezolusaun ne’e, atu membru parlamentu nasional foun bele utilize nafatin kareta sira ne’e, tanba kareta sira ne’e kuaze sei iha kondisaun diak,” hatete Porta voz MUTL, Miguel Arcanjo Moniz da Silva iha Parlamentu oin, Dili.
Nia husu atu estado tau orsamentu ne’ebe sufsiente hodi hadia kualidade edukasaun iha Timor –Leste, dezenvolve setor agrikultura no hadia atendimentu saude ba povu Timor –Leste, duke tau osan bo’ot sosa kareta ba membru parlamentu sira.
Nia konsidera, rezulusaun ne’ebe membru parlamentu aprova halo traisaun ba povu, haluhan tiha interese nasional ne’ebe nudar prinsipio fundamental heroi sira nian luta ba libertasaun nasional.
Nia hateten, MUTL sei kontinua koalia liu husi manifestasaun pasifiku hanesan bainhira laiha rezultaduo ne’ebe neutru no justu ba povu kbi’it la’ek sira.
Maske intensaun MUTL mak atu halao manifestasaun pasifiku, iha segundu manifestasaun kontra rezulusaun PN mosu violensia fiziku entre manifestante no membru seguransa. Ho asaun ida ne’e rezulta kareta publiku no privado balun hetan estragus no polisia konsege kaptura manifestante balun.
Iha parte seluk, Reitor Universidade Nasional Timor –Leste (UNTL) Francisco Miguel Martins hateten reitor la autoriza universitario sira atu utiliza area universidade hodi halo demostrasaun, tanba tuir lei UNTL hanesan instituisaun publika estado, labele, maibe estudante sira kontinua halo.
“Nudar reitor, institusionalmente la autoriza,” nia hateten.
Antes ne’e, nia dehan reitor halo ona karta ida katak tuir estatutu UNTL no instituisaun publika labele halo manifestasaun iha UNTL laran.
“Ita nia alin sira la respeita karta ida ne’e sira halo, entaun reitor laiha kompetensia atu hapara tanba kbi’it laiha atu hapara,” nia dehan.
Nia husu, estudante sira atu halo asaun bazeia ba lei no hakbi’it aan atu hatene asuntu ruma tuir lei, foin halo asaun atu evita inisiativa diak maibe asaun sala.
Nia hatutan, hanesan nasaun demokratiku tenke halo investigasaun klean ba akontesementu ne’e, se estudante sala no se deit mak sala, tenke prosesu tuir lei.
Entretantu, Ministru Interior Longuinhoss Monteiro husu manifestante sira atu hato’o sira nia aspirasaun ho kalma, labele uza forsa tanba bainhira uza forsa, ajente seguransa mos sei uza forsa hodi hakalma situasaun hodi proteje patrimonio estado.
“Hau fo ona orden ba membru polisia sira bele uza forsa bainhira iha anarkismu mosu (tuda malu, estraga ema nia sasan),” nia hateten.
Nia husu, mos ba populasaun sira atu hakmatek tanba asaun ida ne’e sei la fo impaktu ba iha prosesu formasaun governu no legislasaun foun iha tempu badak.
Nia dehan, sei loke prosesu investigasaun ba sira ne’ebe tuda no estraga kareta estado no kareta privado sira.
