Tuir dadus husi Ministerio Saude tinan 2017, maioria suku iha teritorio tomak iha ona postu saude no professional saude sira hodi fo atendimentu saude ba komunidade iha area rural.
Vise Ministra Saude, Ana Isabel Soares hateten iha 452 sukus iha teritorio tomak governu konsege harii ona postu saude hamutuk 368 no sentru saude iha 60 hodi fo atendimentu saude no edukasaun saude ba komunidade
sira.
“La signfika sira (suku) ne’ebe laiha postu saude la hetan atendimentu saude, maibe ho kooperasaun diak ho lider komunitaria sira hodi oferese uma, sede suku ba professional saude sira atu fo tratamentu saude ba
komunidades,” nia hateten iha Sentru Konvensaun Dili.
Nia rekonese, katak fasilidade saude sira ne’e hotu seidauk iha kondisaun ne’ebe diak liu, maibe iha ona kondisaun minimu ruma ne’ebe fasilita servisu hanesan iha ona eletrisidade atu fo atendimentu iha tempu kalan.
Nia informa, oras ne’e dadaun Ministerio Saude emprega hela professional saude hamutuk 4092 ne’ebe destaka ona husi nivel nasional to’o suku hodi fo atendimentu ba komunidade.
Iha parte seluk, Diretor Saude Munisipio Ermera doutor Herculano Seixas dos Santos hateten munisipio Ermera iha 52 sukus no husi suku sira ne’e iha ona 27 postu saude no postu tratamentu ida ne’ebe harii husi Projeitu
Nasional Dezenvolvimentu Suku (PNDS).
Alende ne’e, nia dehan sira mos iha sentru saude 6 ne’ebe lokalizada mos iha suku balun nia klaran.
“Sei menus, maibe 34 sukus mak iha ona fasilidade saude tanba suku balun kobre husi sentru saude, tanba ne’e sei falta deit suku 18 mak seidauk,” nia hateten.
Nia informa, sira mos iha aktividade outreach sira hanesan programa saude familia, Servisu Integradu Saude Komunitaria (SISCa), klinika movel hodi fo tratamentu no edukasaun saude ba komunidade sira ne’ebe iha area
muito remotas.
