Komunidade Alcino dos Santos husu ba governu atu kria kampu servisu ba joven sira ne’ebe durante ne’e dezempregu hela, nune’e bele hamenus problemas iha bairo laran.
Tuir nia, kauza principal joven sira hemu lanu iha dalan ibun sira iha bairo-bairo tanba laiha servisu no balun la remata sira nia estudu.
“Joven sira ne’ebe hemu lanu iha dalan ninin, bele hamosu problema hanesan baku malu, oho malu no bele tuda malu, tamba sira laiha servisu,” nia kestiona, iha Dili.
Tanba ne’e, nia parte husu ba governu foun mai tenke kria kampu servisu ou halo planu ruma ne’ebe diak, nune’e joven sira ne’e bele iha atividades ruma hodi halo ba sira nia moris.
“Governu tenke tau matan ba joven sira ne’e,” nia sujere.
Iha parte seluk, Diretor Nasional Joventude Interino Jacinto A. Ximenes hateten sira iha ona planu ba joven sira ne’ebe ho dezempregu.
Nia dehan, iha ona planu politika nasional joventude nian parseria ho sentru joventude iha munisipius 13 hodi halo dezenvolvementu ba area joventude nian.
“Joven sira ne’ebe putus sekolah, oinsa sira kria grupo no hakbesik aan ba sentru joventude hodi bele tuir formasaun, pur ezemplu sira hakarak atu hakiak animal,” nia hateten.
Nia hateten, governu parseria ho sentru joventude ba formasuan edukasaun sivika, buka oinsa para minimize risku violensia ne’ebe iha. Alende ne’e iha mos proograma interferensia ba joven sira ne’ebe la remata estudu iha
munisipiu sira.
Iha parte seluk Sekretariu Jeral Comisaun Nasional Joventude Timor-Leste (CNJTL), Luis Mendes Ribeiro hateten CNJTL nia papel maka oinsa bele koordena no fasilita joven sira atu bele sai lideransa ne’ebe diak ba futuru
nasaun ida ne’e.
“Ita hatene, governo halo ona esforsu barak,ida maka oinsa fasilita joven sira hodi estabelese parlamento foinsae, ida seluk maka hamosu ona politika nasional joventude ninian, oinsa atu hamenus joven servisu iha dalan
ninin e depois joven sira ne’ebe iha risku laran ne’ebe maka hemu lanu,bele hamosu problema,” nia hateten.
Enkuantu Xefe suku Kaikoli, Hipolito Sarmento Marques hateten dalabarak joven sira ne’ebe hemu lanu iha dalan ninin tanba sira laiha servisu.
“Hau husu ba governu foun mai, tenke kria kampu de trabalhu ba joven sira ne’e, nune’e sira labele tuur hamutuk hodi hemu lanu iha bairo-bairo, depois sira halo problema,” nia sujere.
