Atendementu saude ba nehan (fokit nehan) iha Ospital Nasional Guido Valadares (HNGV) atraza oituan tanba aimoruk anastesia (bius nian) laiha.
Mediku espesialista nehan, Luis da Silva hateten aimoruk anastesia ne’e esensial tebes ba iha tratamentu nehan, liu –liu fokit nehan tenke bius atu labele moras.
Nia dehan, maioria pasiente nehan sira ne’ebe halo tratamentu iha HNGV ne’e barak presiza fokit nehan, tanba barak mak nehan hela deit ona abut labele ona salva.
“Semana tolu ona aimoruk anastesia laiha, entaun ami labele fokit sira nia nehan, maibe ami fo reseita aimoruk deit, sira ba foti iha farmasia hodi hemu deit,”nia hateten, iha servisu fatin Bidau, Dili.
Nia hatutan, konesementu populasaun nian ba saude nehan sei menus tebes tanba realidade komunidade sira to’o iha fasilidade saude nehan hela deit ona abut ne’ebe provoka bubu ona.
Nia informa, tratamentu nehan ne’ebe sira fo mak hanesan fokit, solda no fase nehan atu halo nehan saudavel liu tan.
Nia hatutan, pasiente barak mos idade minoridade (labarik), tanba sira gosta konsumu midar (coklate), maibe la kose nehan rutina, entaun provoka ular han nehan.
Iha parte seluk, Diretora Ezekutivu Servisu Autonomia Medikamentus e Ekipamentus Saude (SAMES), Odete Maria Belo rekonese iha duni stok out ba aimoruk items balun inklui aimoruk espesialista sira nian.
Nia dehan, aimoruk sira ne’e tama tarde tanba prosesu tenderizasaun no asina kontratu hahu tarde.
“Aimoruk balun tama ona no balun sei tama iha fulan Agostu to’o Setembru, tanba kontratu determina tempu ne’e,” nia hateten.
Nia dehan, aimoruk tama iha armagen sei iha prosesu ida tan, liu –liu ekipa ida sei halo verifikasaun ba iha kualidade aimoruk no kriteria sira ne’ebe kompania tenke prenxe antes halo distribuisaun ba iha fasilidade saude sira.
Nia informa, distribusiaun aimoruk ba fasilidade saude sira depende mos ba iha pedidu rekizasaun husi fasilidade saude tenke antes atu ekipa SAMES bele prepara aimoruk no halo distribuisaun.
