Rede edukasaun Timor –Leste Coalition for Education (TLCE) sujere ba Ministerio Edukasaun desentraliza formasaun ba professores sira iha munisipios atu fo mos oportunidade ba iha professores sira iha area remotas.
Koordenador Programa Edukasaun TLCE, Matias dos Santos hateten politika formasaun ba professores sira ne’e positive tebes atu eleva kapasidade no kualidade professores, maibe presiza hadia implementasaun liu –liu tempu no fatin, tanba durante ne’e formasaun akontese bainhira tempu feriadu.
Nia informa, formasaun sira ne’e dala ruma la hetan partisipasaun maximu husi professores, tanba problema distansia entaun sira deside halo buat seluk.
“Ministerio Edukasaun tenke dezentraliza formasaun iha munisipiu sira atu profesores hotu asesu, se nafatin iha nasional sira ne’ebe besik no iha kb’it mak bele tuir, enkuantu formasaun tenke kontinua, la’os hein feriadu,” nia sujere, iha servisu fatin Kaikoli, Dili.
Nia dehan, ho politika ida hanesan professores ne’ebe hanorin iha dader bele tuir formasaun iha lokraik nune’e mos sira ne’ebe hanorin iha lokraik bele tuir iha dader, ho ida ne’e oportunidade bele ba ema hotu no sei poupa mos osan.
Nia informa, total professores ne’ebe hala’o knar nudar edukador iha teritorio tomak hamutuk 13 000.
Hatan ba kestaun ne’e, Diretor Jeral asuntu kooperasaun ME Antonino Pires hateten formasaun ba professores seidauk desentraliza, maibe iha ona munisipio balun ne’ebe sentru formasaun ministerio nian eziste ona, hanesan iha Baucau, Manufahi (Same), Bobonaro no regiaun especial Oe-Cusse.
“Formasaun ne’ebe halo integradu kona ba pedalogia, metodologia hanorin, lian hanorin no materia hanorin hanesan matematika no seluk tan,” nia hateten.
Nia informa, fator ne’ebe kontribui ba iha kualidade edukasaun ne’e barak, maibe governu liu husi Ministerio Edukasaun nafatin esforsu atu eleva kualidade professores no hadia infra-estruturas eskola no kondisaun seluk hodi responde ba iha nesesidade ne’e, maibe presiza tempu.
