Reprezentante grupos produtor tais nain rua husi munisipio Baucau no Lautem hetan oportunidade partisipa feira internasional Folk Art Market iha Santa Fe, New Mexico durante semana rua.
Koordenadora Programa Hakbi’it Ekonomia Fundasaun Alola, Ilda Maria da Cruz hateten feira ne’e anualmente no oportunidade ida ne’e ba dala rua nian ba grupo benefisiario Alola nian, tanba iha tinan 2013 iha grupo ida mak
partisipa ona iha feira hanesan.
Atu partisipa iha eventu internasional ne’e, nia hateten Fundasaun Alola halo aplikasaun tinan ida antes, liu –liu haruka biografia grupos nian no produtus atu komisaun organizadora bele halo selesaun.
Nia informa, Fundasaun Alola hamutuk ho parseirus halo selesaun ba iha grupos kolektivu hitu husi grupos benefisiario hotu no ikus mai hili reprezentante husi grupo rua ne’e, tanba sira iha komitmentu no abilidade ne’ebe
diak atu partisipa iha feira international inklui sira iha produtu ne’ebe kualidade diak.
Sira nain rua ne’e, mak Armindo Moniz husi munisipio Lautem suku Home.Nia mak ema ne’ebe halo inovasaun ba produtu tais ba iha pastas, karteiras no asesores sira seluk.
Alende ne’e Lucia Ximenes, husi munisipio Baucau, postu administrativu Quelicai, suku Afahsa. Lucia hanesan suru nain ne’ebe iha abilidade atu halo kores origin hodi produs tais.
“Ita hakarak sira rua bele sai fali ezemplu no inspirasaun ida ba iha grupo produtor sira seluk no sai katak bainhira ita halo negosio, labele tuur hein deit maibe tenke badinas la’o buka oportunidade,” nia hateten, iha
Mascarenhas, Dili.
Alende partisipa iha feira, ekipa ida ne’e mos tuir workshop international ida kona ba diversifikasaun produtu locais.
Entaun, nia konsidera, oportunidade ne’e importante tebes la’os deit ba Fundasaun Alola, maibe ekipa ne’ebe ba reprezenta Timor –Leste tanba sira sei promove produtu Timor ba nasaun seluk no hatudu ba nasaun seluk
oinsa produs tais hanesan identidade Timor –Leste nian.
Programa ida ne’e hetan apoiu finanseiru husi Embaixada Amerika iha Timor –Leste liu husi parseiru servisu hanesan The Asia Foundation no Fundasaun Alola.
Iha parte seluk, responsavel Grupo Fitun Tais Lucia Ximenes orgulho tebes tanba bele hetan oportunidade ida ne’e hodi partisipa iha feira internasional Folk Arts Exhibition.
Nia dehan, iha exhibition ne’e sei hatudu tais sira ne’ebe produs husi nia grupo rasik ne’ebe produs traditionalmente liu –liu uza kabas ho kor natural sira.
“Ida ne’e sei sai esperiensia ne’ebe importante tebes mai hau no hau nia grupo Fitun tais,”nia hateten, antes sai husi Timor ba Amerika partisipa iha eventu ne’e.
Nia dehan, tinan kotuk hahu promove sira nia produtu tais liu husi feira Natal ne’ebe orgnaiza husi Fundasaun Alola no husi ne’e ema barak mak hatene ona sira nia produtus, tanba sira iha produtu ne’ebe uniku liu –liu kabas
no kor ne’ebe sira uza halo tais ne’e 100% natural.
Nia konsidera, soru tais hanesan profisaun ida hodi hetan rendimentu no nafatin preserve kultura liu husi promove tais origin Timor –Leste nian ne’ebe bei-ala sira husik hela.
