Governu Timor –Leste hahu uza ona passaporte digital (eletroniku) ho padraun internasional hodi fasilita no hafasil sidadaun sira nia viajen ba rai liur ho diak liu tan.
Ministru Justisa, Ivo Valente hatete agora sira halo ona tranzisaun passaporte manual ba eletroniku no sei halo lansamentu iha Maiu 2017.
“Passaporte eletroniku ne’e nia la hanesan ona ho passaporte manual tanba nia sistema ne’e uza metric, ne’e teknologia aas no ba iha kualker aero portu internasional bele ona rekonese,” Ministru Valente hateten, iha Dili.
Tuir nia, uza sistema metric ne’ebe kategoria kualidade diak no karun, entaun sei iha subida oituan kona ba folin ba tratamentu dokumentus ida ne’e, por ezemplu, tratamentu ba durasaun semana ida sei selu $50, loron tolu
$75 enkuantu loron ida nian $100.
Razaun hasa’e folin, tanba nia dehan governu sei uza reseitas ne’e hodi garantia sustentabilidade atendementu ba tratamentu passaporte eletroniku, hanesan hadia makina karik avaria no seluk-seluk tan.
Maibe, nia hatete ba ema moras ho kbi’it la’ek ne’ebe laiha osan atu trata passaporte ne’e, governu sei kolabora ho Ministeriu Solidaridade Sosial (MSS) atu apoia.
“Ba ema kiak ne’ebe moras, sira tenke hatama deklarasaun suku katak sira kiak duni, entaun governu sei apoia” nia dehan.
Kona ba komunidade ne’ebe uza passaporte manual no sei ativu hela, nia dehan ne’e nafatin validu no kontinua uza lai to’o wainhira nia prazu liu ona mak bele trata foun, hodi transita ba passaporte eletroniku.
Iha parte seluk Membru Parlamentu (MP), Cesar Valente konsidera ne’e hanesan progresu ida ne’ebe Ministeiru Justisa atinji.
Tanba antes ne’e, nia dehan iha komunidade barak reklama hasoru problema wainhira uza passaporte manual ba rai liur, sempre hasouru failansu.
“Sira balun ate deputadu sira uza passaporte manual ba rai liur, ema nia makina sira ne’e la detekta ita nia passaporte, ne’e problema ida maibe hau sente ho ida ne’e bele responde ona,” nia dehan.
Kona ba folin passaporte digital ne’ebe sa’e maka’as , nia dehan governu iha razaun ne’ebe pozitive hodi hasa’e folin, e nudar sidadaun tenke apoia, ezeptu komunidade kbi’it la’ek sira.
