Mane ida (arguido) ta’a nia fen (lezada) iha parte ain karuk, tanba deit lahatan arguido foti osan atu sosa tua sabu hodi hemu ho nia kolega sira.
Tuir akuzasaun husi Ministeriu Publiku ne’ebe lee sai husi juis prezidente, katak iha tuku 08:00 kalan, arguido fila husi servisu no husu osan ba lezada atu ba sosa tua sabu.
Maibe iha altura ne’eba lezada lahatan hodi dehan “tanba sa la aban deit”, maibe arguido ho nervozu tama foti osan iha armari hodi ba sosa tua sabu masa lima liter ida ho agua bo’ot rua.
Hafoin sosa tua, arguido bolu nia kolega sira hodi hemu hamutuk, wainhira arguido fila, mosu diskusaun entre lezada ho arguido tanba lezada la autoriza arguido foti osan hodi ba sosa tua.
Durante diskusaun nia laran, arguido komesa nervozu hodi foti katana ta’a kona iha lezada nia ain karuk inklui lori fatuk tuda no baku dala ida iha nia kotuk laran.
Akontesementu ne’e rezulta lezada hetan suku iha ain pontu hitu, kotuk laran sente moras hodi la halo atividades nudar dona de kaza.
Depois de lee sai akuzasaun hirak ne’e, juis prezidente husu ba arguido atu hili koalia ou nonok, maibe arguido hili nonok hodi prova katak akuzasaun hirak ne’e los hotu.
Alende ne’e, juis prezidente mos husu ba lezada atu fo nia deklarasaun, katak oras ne’e dadaun sira nain rua diak malu ona no hela iha uma ida hodi tau matan ba sira nia oan.
“Ami diak malu ona, moris nudar fen-laen,” nia dehan.
Enkuantu Ministeriu Publiku akuza arguido komete krimi violensia domestika ho forma maustratus ba konjugue previstu iha artigu 154 ho nia moldura penal tinan rua to’o tinan neen kadeia.
Enkuantu julgamentu ba kazu ne’e dirije husi juis koletivu, representante Ministeriu Publiku prokurador no arguido hetan defeza husi defensor publiku.
