Tribunal Munisipal Dili fo pena suspensaun tinan ida ba mane ida (arguido) tanba halo agresaun fizika hasouru nia konjugue.
Tuir akuzasaun Ministeriu Publiku ne’ebe lee sai husi juis prezidente, katak iha loron 24/02/2016/, tuku lima lokraik, arguido prepara aan atu ba festa kazamentu, maibe iha altura ne’eba lezada bandu arguido labele ba tanba sira nia oan moras.
Iha momentu ne’eba, arguido la rona saida mak lezada koalia tanba arguido ansi no tauk tarde ba festa e entaun lezada xave tiha odamatan hodi nia labele ba festa.
Arguido obriga nafatin lezada atu fo xave hodi loke odamatan, maibe tanba lezada la fo, entaun arguido foti telefone tuda ba lezada hodi kona lezada nia ulun, hafoin ne’e lezada mos foti bikan hodi tuda ba arguido maibe la kona.
Tanba lezada sente aktu ne’ebe mak arguido halo ba nia ne’e krimi ida no kontra lei, entaun nia hato’o keixa ba polisia.
Hafoin lee sai akuzasaun hirak ne’e, juis prezidente husu ba arguido atu hili koalia ou nonok, e iha altura ne’eba arguido hili nonok hodi prova katak akuzasaun hirak ne’e los hotu.
Iha tempu hanesan mos, juis prezidente mos husu ba lezada atu fo nia deklarasaun iha tribunal.
No iha altura ne’eba (julgamentu), lezada konfesa katak agora dadaun lezada no arguido diak malu ona, tanba hetan konselho husi familia.
“Ami tuur hamutuk no rezolve ona liu dalan familia nian,” nia dehan.
Iha okaziaun ne’e, parte defeza husu ba tribunal atu fo pena ne’ebe natoon tanba arguido konfesa duni nia salan no sei la repete tan aktu hanesan iha futuru.
Hafoin rona tiha deklarasaun hirak ne’e, juis prezidente deside fo pena suspensaun tinan ida ba arguido.
