Durante tinan 2016 kazu krimi ne’ebe konsege registu iha Polisia Sientifika Investigasaun Kriminal (PSIK) hamutuk 221 kazus.
Xefe Departamentu Legal no Konsultasaun e Relasaun Publiku, Adino Nunes Cabral, hateten husi 221 kazus ne’e, delega husi Ministeriu Publiku iha 139 kazus no 22 kazus flagrande direitu husi PSIK rasik.
Nia hateten, kazu sira ne’ebe hetan ona relatoriu final hamutuk 84 no sei pendente hamutuk 30.
“Kazu ne’ebe sei pendente ami nafatin esforsu hodi buka suspeitu sira ne’e,” nia dehan.
Enkuantu kazu ne’ebe ho volume aas, nia informa mak burla agravadu hamutuk 38, omisido 25, insendiu 18 no falsifikasaun dokumentus 15.
Nia hateten, kazu 22 husi PSIK delega ona ba iha ministeriu Publiku hodi prosesa.
Nia kompara, kazu krime iha tinan 2015 ne’ebe registu iha PSIK hamutuk 58 no ne’ebe delega husi ministeriu publiku iha 30 kazus.
Nia hatutan, husi kazu sira ne’e PSIK konsege halo relatoriu final hamutuk 40 deit e restu sei iha prosesu investigasaun.
Nia dehan, kazu sira ne’ebe delega husi ministeiru publiku kuaze kazu krimi sira ne’ebe akontese iha tempu pasadu hanesan tinan 2006 no 2011.
Iha parte seluk membru Parlamentu (MP) Paul Moniz, orgulho ho servisu PSIK nian tanba maske foin estabelese iha tinan 2015 maibe konsege atende ona kazu pasadu balun.
“Ita tenke admira ho sira nia servisu tanba sira konsege resolve kazu balun,” nia dehan.
Maibe, nia husu ba PSIK atu nafatin esforsu atu buka tuir suspeitu ne’ebe agora kontinua livre maske sira konflito hela ho lei.
“Sira tenke nafatin esforsu hodi hetan suspeitu sira ne’e, nia dehan.
