Komandante Unidade Polisia Maritima (UPM), Lino Saldanha hateten polisia maritima presiza kilat foun tanba kilat ne’ebe iha agora barak mak aat ona.
Nia hateten, governu no komando PNTL presiza fasilita Unidade Maritima ho kilat ne’ebe diak no kualidade, tanba servisu ne’ebe sira hala’o risku tebes.
Hanesan foin lalais iha 28 Janeiru 2017, nia dehan iha roo ilegal rua mak tama Timor e polisia maritima konsege tiru sira dala rua, maibe atu ba dala tolu labele ona tanba kilat avaria tiha.
Maibe iha altura ne’eba, nia informa roo ilegal hirak ne’e konsege halai hodi la halo atividade peskas.
“Kilat AK33 ne’ebe sira uza durante ne’e labele ona tanba uza kleur ona husi 2006 kedas ne’e,” nia dehan.
Pior liu tan, nia hateten kilat 280 pucuk ne’ebe uluk sosa husi nasaun Malaysia ne’e mesak uzadu hotu.
“Sira uza kleur ona mak fo fali ita,” nia dehan.
Nia informa, kestaun ne’e hato’o ona ba komando, maibe seiduak iha resposta ne’ebe positivu.
Nia hateten, unidade Polisia Maritime husu kilat la’os atu halo funu maibe atu membru sira iha korajen hodi implementa lei.
Iha parte seluk Membru Komisaun B (seguransa, defeza, negosiu estrangeirus), Cesar valente hateten iha tinan 2014 PNTL konsege sosa ona kilat ho intensaun atu oferese ba Unidade Polisia Fronteira (UPF), maibe ikus mai la’e.
Nia hatutan, foin lalais iha tinan 2016, PNTL planu atu sosa tan kilat maibe parlamentu la konkorda tanba sira atu sosa kilat ne’ebe second hand.
“Ho razaun hirak ne’e mak ami la tau osan, maibe hau rona dehan sira sosa ona e ami presiza klarifikasaun,” nia hateten.
Nia rekonese, unidade rua ne’e (UPM no UPF) presiza tebes kilat, maibe jestaun kilat iha instituisaun PNTL mak seidauk la’o ho diak.
