Kada tinan governu aloka $40 mil resin hodi sosa aimoruk ba programa vasinasaun animal ho rutina, maibe iha munisipio balun ladun la’o efetivu tanba menus partisipasaun husi komunidades.
Objetivu husi programa ne’e, mak atu prevene moras ne’ebe afeta ba animal liu–liu fahi, karau no manu husi moras Septicemia Epizootica ne’ebe afeta ba karau, moras Kolera ba fahi no moras Newcastle disease (NCD) ne’ebe ataka manu kada tinan.
Membru Parlamentu (MP), Josefa Alvares Pereira hateten programa ne’e diak maibe presiza halo sosializasaun nafatin ba komunidade hodi sira bele iha konesementu ne’ebe diak kona ba importansia animal nia saude.
“Hau hanoin sosializasaun ba komunidade labele para, nafatin konsensializa sira hodi fo importansia ba saude animal nian,” nia hateten.
“Tanba animal moras bele fo moras mos ba ema no costume Timor nian animal moras mate nia naan han no fa’an fali ba ema seluk.”
Atu programa ida ne’e susesu, nia dehan tenke involve komunidade sira liu-liu hasa’e sira nia konesementu tanba sira lahatene tratamentu ba animal, entaun susar involve aan iha programa ne’e.
Iha parte seluk, Diretor Jeral Pekuaria no Veternaria Ministerio Agrikultura e Peskas (MAP), Antonio do Carmo rekonese sosializasaun ba komunidade seidauk maximu tanba falta rekursu humanu.
“Ami fo ona kapasitasaun ba voluntario dois mil husi 222 sukus hodi ajuda halo vasinasaun ba animal,” nia hateten.
Alende ne’e, nia hateten sira mos koloka ona tekniku saude animal iha postu administrative sira hotu hodi implementa programa vasinasaun inklui halo sosializasaun no formasaun ba komunidade sira.
Iha planu estrategiku nasional 2020, nia dehan governu iha obrigasaun atu fo atendementu vasinasaun gratuita ba komunidade nia animal tanba ne’e governu tau osan hodi sosa aimoruk.
Nia hatutan, iha bacteria balun ne’ebe moris iha animal nia isin la hadaet ba ema bainhira konsumu, maibe diak liu lalika konsumu na’an animal ne’ebe mate tanba moras.
Nia informa, tinan ida sira halo vasinasaun dala tolu ba animal liu –liu iha fulan Marsu, Fevereiru no Novembru.
